أبو حاتم وبنت الدواهي

محمد خلف الشمري

عاش زوجان من الغربان في عشهم الهادي بإحدى الأشجار.. وفي يوم من الايام شافتهم بنت الدواهي "الافعي" وقررت العيش تحت الشجرة... فعلها هذا لم يعجب الزوجين بس ما باليد حيلة... وفي يوم من الايام السعيدة وضعت بنت بن بريح بيضها... وبعد ان تطمنا عليه غطياه وطارا بحثا عن الطعام، وفي غيابهم تسللت بنت الدواهي جارة السوء والتهمت البيض كله الامر اللي أزعجهم كثيرا... وبعد عدة اشهر وضعت بنت بن بريح بيضا جديدا وقالت اسمع يا بوحاتم يا سبعي علينا التناوب واحد يحرس العش والثاني يبحث عن الطعام...
مرت الايام ما بين بعاد وخصام، كبر حاتم واخوانه وبينما كان الأب خارجا لطلب العيش والأم متوسدة جناحها نايمة... صعدت "بنت الدواهي" لأكل الصغار، وأول ما شافها حاتم قام يصارخ لحقي علينا يمه !
قامت الأم من نومها وأخذت تصارخ مع عيالها، وبهذي اللحظة ظهر احد الحيوانات من بين الأشجار وأول ما شافته بنت الدواهي "فركتلها"... وفي المساء عاد الأب وقصت ضفايرها الأم السالفة وقالت يابو حاتم يا سنايدي شف لنا بيت ثاني نعيش فيه !.. وين نروح يا أم حاتم انت ناسية ان الديون والأقساط خانقتني ولا عندي القدرة على شراء بيت جديد ؟!... تدرين اشلون يا حرمنا المصون ابي اروح للثعلب الحكيم لعل وعسى يلقى لنا حل لمصيبتنا !.. يوم انه اصبح الصبح طار للحكيم وقص عليه سالفتهم وقاله: انا داخل على الله، ثم عليك يابو نوفل "سمى ولد عمك يا بو بندر" تشوف لنا حل... وانا ابو نوفل اشرب قهوتك موضوعك بسيط، واترك عنك الهشتاغات لانها ما نفعت اهل الكويت بمطالبهم !.. يابعدي كل آفة يسلط عليها ربي افة اكبر منها... وعندها مسك شاربه الأيمن، وقال ماهو على رجال ان ماخلصتك.
اسمع يابو حاتم بكرة راح تجي الأميرة، وحراسها للسباحة بالبحيرة ومن عوايدها تفسخ قلادتها علشان ما تبتل بالماء، كل اللي عليك اخطف القلادة وطير بالسماء العالي وأول ما يشوفك الحراس قطها داخل جحر بنت الدواهي وخل الباقي على الحراس... تحمس أبو حاتم للخطة ونفذها بحذافيرها "حافر حافر" وعندما حفر الحراس الجحر بحثا عن قلادة الأميرة شافوا الافعي داخله وقتلوها... وبعد ان تخلصوا من بنت الدواهي رجع أبو حاتم و شريكة حياته بنت ابن بريح وبزارينهم الى عشهم من جديد.. وأقام ابو حاتم حفل استقبال كبير "معاه طهور حاتم" دعى اليه كبار اهل الغابة على شرف ابو نوفل الحكيم.
الخبير: سايق عليك النبي يا حاج انك تديني شرف قول ملخص الحكاية وهو يتمحور يا جماعة من يعتدي على الضعفاء دون وجه حق... فان الله قادر على ان يرسل من ينتقم منه ومن كل المجرمين.
المتمولس: لا تظن كل من نظر لك مغرم فيك !.. يمكن نعاله "اعزكم الله" مسروقة ويشك فيك... وفي هذه الأثناء رفع على مسامعنا الشيخ زغلول اذان الظهر.

كاتب كويتي