أشياء من غير عقل تفعلها فينا الحكومة الرشيدة

د. حمود الحطاب

إذا تبليت عليكم ما راح اقول رقبتي سدادة؛ رقبتي مو رخيصة؛ إنها سدادة دين للي خلقها فقط؛ والضعفاء الباقون نقول لضعفهم وهزالهم امام عظمة الله،"فاقض ما انت قاض؛ إنما تقضي هذه الحياة الدنيا".
ما اقول رقبتي سدادة لبشر لأني ما راح اتبلى على أحد؛وقد أحسن والداي واسرتي تربيتي على القيم؛ واي زلل يصيبنا فمما جنته عقولنا لحظيا ومن الشيطان. واليكم الأدلة على أن الحكومة الرشيدة تطلب منا نفعل اشياء من غير عقل وتبي تجننا:
مكتوب على جميع المطاعم وحتى مطعم الباچه والكراعين؛ مكتوب على الأبواب: ممنوع الدخول بغير كمام... "زين وشلون ناكل والكمام على فمنا وانفنا؟ ناقشوني بالعقل: شلون آكل الباچة؟ شلون ادخل الكراعين بحلجي،شلون؟ ادعس الكراع بفمي ومعاه الكمام؟ شلون آكل والكمام على فمي.
ممنوع الدخول للمطاعم من غير كمام شلون اشرب الشاي والقهوة؟ هل في هذه التعليمات الحكومية الرشيدة ومثلها معها من عقل؟
الحكومة الرشيدة تطلب منا فعل مالايعقل ولا يستطاع ؛ وإذا اردت أن تطاع فاطلب المستطاع، ومن هنا فلاسمع ولا طاعة للحكومة في بلع الاكل والكمام على فمنا، هذا جنون ومستحيل وطلب غبي.
في المطار دعوة مستمرة في الميكروفونات تتكرر مرات عديدة للالتزام بالتباعد وتأتي لحظة الاصطفاف الأخيرة للدخول الى سلم الطائرة فيتكدس الناس -من سوء التنظيم -يتكدسون عند بوابة المغادرة وتسقط تعليمات الحكومة قبل ركوب الطائرة.
ترى يا حكومتنا الرشيدة كم عدد ركاب طائرة الار باص 707؟ وتعال شوف كيف الكراسي لاصقة ببعض حتى انك تدخل على الجنب بين الكراسي لتصل الى مقعدك اي، بي،سي؛ وكل شوية اعلان: حافظوا على قواعد الصحة بالتباعد؛ اشلون؟ اشلون؟ اشلون والكراسي المتلاصقة ببعضها؛وهواء نفسي الكربوني عند نفس اللي امامي ونفس اللي خلفي واصلني. آمنا بالله.. ويأتي وقت تناول الطعام ونعود للالتزام بارتداء الكمام... شلون ارتدي الكمام وأنا آكل؟ وهنا يقلع الجميع الكمام ؛ جميع ركاب الطائرة وبموافقة ومباركة كل آمري النسر الجوي لان "كورونا" تنحاش وقت الأكل في المطاعم والطيارات.
بعض قيادات "الكويتية" بس شاطرين يستعرضون نسفات غترهم في برامج الطائرة المملة ويبينون انجازاتهم؛ربما خوفا من بعضهم على كرسيه؛ هؤلاء القياديون اول من خالف اوامرهم الرشيدة بلصق الكراسي ببعضها رغبة بالدينار والدرهم عشان يقولون حققنا ارباحا.
ليش ما يشيلون من بين كل ثلاثة صفوف وراء بعضها يشيلون صف ويوسعون على ركب وريول عباد الله اللي دشت تحت الكراسي تداعب الذين امامها من تحت الكرسي ومن غير قصد، هل تبليت عليكم.
إن شاء الله باجر اكتب: اشلون بعض الحكومات يساعدون الحرامية البواقين بالملايين اشلون يساعدونهم بالهروب الجماعي من احكام العدالة القضائية النزيهة؛ الرشيدة ؛ويقصون على شعوبهم المحبة لهم؛ بحيل غير ذكية؛ حيل غبية جدا ما يصدقها حتى المجنون، ومن عادة الحرامية يغطون على بعضهم، واثبت لكم اني ما تبليت على عقل أحد من العالمين.

كاتب كويتي
[email protected]