النهار بعلم وبالليل يجيك الخبر !

"اخر اخبار الجرايد اليوم ياخبير" قالها الرجل ؟
الخبير:" بص حضرتك بيقولك ان محافظة الفروانية سوف تشهد انطلاق الحملات الميدانية لقطع التيار الكهربائي وتسجيل مخالفات لمساكن العزاب المخالفة في مناطق السكن الخاص والنموذجي في مختلف المحافظة، بالتعاون مع بلدية الكويت ووزارة الكهرباء والماء"( ضحكة بصوت عالي من الشايب)
أضاف الخبير :" الأخ اللي هناك تسحب منه كباية الشاي، ويتكتب عنده سوء استماع وسخرية! ايه يا عم الحاج، ايه اللي مش عاجبك بكلامي"؟
الشايب:" تذكرت سالفة صارت البارح"!
المعاق:" هلها علينا ياعمي الشيخ نبي نعرفها".
الشاب:" خلونا نناقش خبر الخبير وعقب مانخلص نستمع لسالفة شايبنا"!
الخبير:" عداك العيب يابو الشباب يا سكره".
الشايب:" اللي ضحكني موضوع نفس اللي يقوله الخبير. اسمعوا يا محفوظين السلامة، البارح رحت لعشاء عند خوالي (يا دلالي)، واول ما نزلت من سيارتي سمعت صوت مولد كهربا كبير عند بيت كله سكن عزاب من الارض للسطح! يوم سألت الخوال عن الموضوع قالوا: جت طوارئ الكهرباء وقطعت الكهرباء عن البيت! وماهو بس هذا البيت بالحارة اللي مقطوع الا فيه ثلاثة غيره وكلهم جابوا لهم أهل العقارات مولدات كهرب علشان السكان".
الخبير:" ايه اللي بيضحك بالموضوع يا حج"؟
الشايب:" لا بارك الله بالعجلة، وراك صاير عجل ياخبير؟ ما أطولها عليكم عقب ما خلص العشاء رديت لسيارتي، وإلا صوت المكينة طافي وكهرب البيت شغال! بيني وبينكم اشتغلت عندي وقلت بنفسي وش السالفة؟ رفعت السماعة واتصلت بواحد يعشق هالسوالف، يجيب العلم، وسألته عن الموضوع قال الطوارئ اللي قطعته بالعشاء هي اللي رجعته باخر الليل! سألته وشلون حصل هذا؟ قال لي كله ببركة الواسطة، ومو بس هذا الا حتى المشتكين على سكن العمال البلدية علمت باسمائهم نَفَر نَفَر! ونفهم من هالكلام يالربع (بصوت ابو مشاري) ان اللي تسمعونه حكا بحكا كلها دغدغة مشاعر ماهي اكثر"!
الرجل:" افا وين القانون"؟
المعاق:" مع ريح الهواء مسافر".
الخبير:" على كدا حقك علي يا حج، وسايق عليك النبي تقبل كباية شاي بفتله عوضا عن اللي اتسحبت".
المتمولس:" الشي الوحيد اللي قاعد يتطور في الكويت الحفريات، تحس حالفين يطلعون ابليس من تحت الارض! وفي هذه الاثناء رفع على مسامعنا الشيخ زغلول اذان الظهر".
كاتب كويتي