خليفة خَلَف خَلَف الله خِلْف خِلاف غير المحامي

محمد خلف الشمري

عندي رسالة لكل مسؤول قالها الخبير، والرسالة دي غناها المرحوم محمد الكحلاوي في فيلم «خليك مع الله» وكلماتها تقول: «خليك مع الله واعمل الطيب... سلمها لله تلقى البعيد قريب... خليك مع الله وربى بيتك... واجعل كتاب الله قضيتك... مينوبك يالعبد غير الى في ايدك... حاذر ده يوم القصاص قريب... خليك مع الله وارض يرضالك... واصنع جميل تلقاه دايما على بابك»... الف رحمة ونور تنزل عليك يا ملك الإنشاد الديني.
الشاب: هالكلمات الحلوة أهديها لكل مسؤول ماسك مسؤولية! ودام الكلام عن المسؤولين اعتقد انهم سمعوا المناشدات والاستغاثات المتكررة والمتواصلة من كم سنة لوزارة الأشغال من المواطنين لاصلاح الطرق المتهالكة التي عفى عليها الزمن، ولكن المسؤولين، للاسف، أذن من عجين لقيمات والأذن الثانية من طين، والله شي عجيب اللي يصير بالكويت الناس تفرح بالأمطار، وأهل السيارات من مستعملي الطرق يدعون وهم «معرين» صدورهم ان الدنيا ما تمطر والسبب الشوارع اللي كلها حصم وصلبوخ وحفر «ليتنا على الدبايات ولا شفنا الزفلته»!
ما تركت السيارات بحالها، اللي شيالها مكسور واللي جامها جن حايشه جدري هذا غير تبديل الرنقات والتواير كل فترة! بصراحة شي يفوق الخيال ويفوق قدرة واستطاعة المواطن الغلبان، اللي مدعوك دعك بأسعار مبالغ فيها!
ومع كم هالمشاكل للاسف الحكومة تجدد للوزير المختص بولاية ثانية وتعطيه وزارة ثانية فوق البيعة بنظام خليفة خَلَف خَلَف الله خِلْف خِلاف غير المحامي! ما أدري الى متى الحكومة متساهلة بهذا الموضوع»للصبر آخر خلاص تكسرت السيارات»، اللي يهم كل المواطنين السكوت عن أخطاء وزارتها ووزرها المتكرر من كم سنة؟
وللاسف كل يوم يطّلع لنا واحد يطالب الشعب بدعم الوزراء وتركهم بحالهم يشتغلون! والله ملينا صبر على تكرار الأخطاء ما ادري وش ناقصنا في ظل الديمقراطية اللي نتغنى فيها ليل ونهار، وان حنا دولة فريدة من نوعها بالمنطقة وان حنا سباقين بكل شي!
وفي الختام، أذكر السادة المسؤولين، هل عندكم خبر بان يوما من الايام استقال وزير في بريطانيا العظمى بسبب تأخره لدقائق عن جلسة البرلمان؟ بالله ما تقولون لي حنا لمتى سعارنا نسمع ونسلم؟ واللي يرحم والديكم حسوا فينا ترى اللي فينا مكفينا واللي ماهو قد المسؤولية يا ليت يعتذر بصمت لان الكويت ما تستاهل اللي يصير فيها وسلامتكم.
المتمولس:» ساعات الحياة بترجع تحطك في الموقف نفسه مرة ثانية عشان تشوفك لسه حمار (اكرمكم الله) ولا تعلمت»؟ وفي هذه الاثناء رفع على مسامعنا الشيخ زغلول اذان الظهر.

كاتب كويتي
@Aloooyaomm
‏[email protected]