سن عافية الذهبي!

محمد خلف الشمري

"تشط تشط لديك رسالة جديدة محد قراها ومصدرها تلفون الشايب ابو تريك(طيب الله ثراه) اللي قال: تعال يابو الشباب والساحل الفحيحيل اقرأ الرسالة لي". الخبير:" القشة بقت معدن وقصدير على العموم بهنيك على جرأتك يا حاج، اول مرة بحياتي اشوف حد ما يهموش معرفة حد لرصيده البنكي، أهو ده أرذل العمر مش برضوه"؟
الشايب:" أهع أهع، ينكت الحبيب، الله يلوع جبدك بصوت بورزيقة بمسرحية حامي الديار، الظاهر ان انت ماعندك خبر ان انا اكبر مرتوت لأهل حملة اسقاط القروض الله يفرجها عليهم"؟
الشاب:" يا عمي الشيخ الرسالة مكتوب فيها" تم إصدار الموافقة على الطلب المقدم من عيادة الأسنان بمبلغ 92 دينارا، للاستفسار يرجي الاتصال على الرقم التالي ........".
الرجل:" الله يرحم ايام المستوصف، اشوف دنياك تغيرت يا حجي، وصرت تراجع العيادات الخاصة"؟
الشايب:" البركة ببطاقة عافية لو ما هي جان صاف دور بمستوصف(عاوز خلع) العز والهنا، والسالفة وما فيها تحشية ضرس واحد ما غيره، ومن غير شيل عصب، بس والله نهيبه 92 دينارا(يمكن سن ذهب؟) على ضرس واحد حاسس انهم غلبوني بالسعر، هم مادروا ان هالمبلغ عشر راتبي التقاعدي، ما اقول الا الله يعز الكويت وحكومتها، ويديم عزك يا عافية".
المعاق:" يعني هي جت على ضرسك وعليهم بس، يالربع البلد كله منهوب من أسمن أهله تحت شعار اللي جدامك أكله بالهنا والشفا(الحساب يوم الحساب) الا من رحم ربي، ولهذا أطالب بالتصدي لكل محاولات اللف، والدوران بالمال العام، وهالسنة، بان يتم اشهار(فضح) كل الحرامية بعد ان يتم تجميعهم بمكان ما، ومصادرة أملاكهم، ومو بس جذا الا زجهم زجا جماعات وافرادا بالسجون علشان غيرهم يتأدب، وإذا غير ذلك فالحرامية راح تزيد، واسأل الله العظيم ان شرهم يكون بنحورهم، بعيدا عن المال العام هذا رأي الخاص".
الشايب:" ونعم الرأي، وأبشرك كل اهل الكويت ربع ما كلين شاربين من الطبقة المسحوقة( لقطه تصويرية تبرز حول عيون الشايب) رأيهم من رأيك(بصمت)، وياجعله زقوم ابو ديج لكل واحد استباح فلس من أموال البلد بغير وجه حق، واما بطاقة عافية واللي يصير فيها فهو شي غير معقول، ولهذا أطالب الحكومة بمراقبة مصاريفها واسعارها للحد من استغلالها، وانقاذ المتقاعدين من بعض انصاص الدكاترة اللي ما عندهم غير سحب رصيد عافية بالطلعة والدخلة وراجعنا بعد اسبوع"!
المتمولس:" لا تتسابق مع الحمير( اعزكم الله) لانهم ان هزموك ستكون حمارا خاسرا، وان فزت عليهم راح تكون الحمار الأفضل"!
وفي هذه الاثناء رفع على مسامعنا الشيخ زغلول اذان الظهر.

كاتب كويتي
‏[email protected]