شركة ماء للاتصالات لا بيض الله وجهكم!

محمد خلف الشمري

"عن اذنكم يالربع مشوار قريب وراجعين يا هوا لكم مرة ثانية"، قالها الشايب وقال:" قم يا خبير كرب خيوط جواتيك اعزكم الله علشان نروح نخلص لنا شغيل صغيرون يا بعد اهلنا".
الخبير:" من عيني دي قبل دي، انت تامر حسني امر يا حاج، ويسقط يسقط اتحاد الطلبة".
الرجل:" على وين العزم يا حجي وساحب معاك الخبير"؟
الشايب:" لشركة ماء (جليب) للاتصالات ناوي اجدد الاشتراك، ولعل وعسى يعطوني جهاز جديد بدل من اللي متيبه بتيب ازرق من العام الفارط"!
المعاق:" انحش يالذيب انا رأيي تتمهل وتنتظر كلمة احبك لما موجة "كورونا" تخلص، وترجع الأمور مثل اول او اقل حبتين"!
الشاب:" خله يروح و"كورونا" وش له دخل بموضوع تجديد الخدمة، الله اكبر عليكم يا اهل الكويت علقتوا كل المشاكل برقبة "كورونا" ومنظمة الصحة العالمية"!
المعاق بعد تنهيده تخللها شهيق وزفير بلازا بورصة قال:" أمس مريت عليهم لقيت المركز الرئيسي زحمة لدرجة ان الناس واقفة خارج المبنى بالحر، قلت ما فيني شده اوقف معهم بحكم إعاقتي، قلت اروح لمكان عليه الدوس قليل، رحت له وفعلا لقيته شبه فاضي، الموجودين جزاهم الله خير خلوني قبلهم، ووحده الله يستر عليها يوم انها شافت عصاتي قامت عن كرسي بلاستك وعطتني إياه، عطيت الموظف الرقم وقلت ابي كرت بدل فاقد طقطق أصابعه بالكمبيوتر وقال: اديني خمس دنانير، عطيته مطلبه وزود دقيقة، بص على حضرتي وقال السيستم مش راضى مرضي يقبل معاملتك، استنى على جنب يا اسطا، وبعد شوي بص عليَّ وقال السيستم معلق فانيلة وشورت على معاملتك، روح وتعال بسرعة لفرعنا الرئيسي او فرعنا الثاني الجديد، سحبت كراعيني وعصاتي تقودني ورحت للي قالي، وبعد ثلاث لفات بالمواقف حصلت مكان لان كالعادة مواقف المعاقين محتلة.
ما أطولها عليكم لقيتهم فاضيين سلمت عليهم وعطيتهم الرقم، وقلت ابي يا اخوك اجلس على الكرسي اللي وراك، التفت عليَّ وقال بزعل تجلس وين؟ لا تحرجنا ممنوع الجلوس (مع العلم شركة مااء بنفس المجمع حاطين كرسي جالس عليه واحد) بأمر البلدية بسبب" كورونا" قلت له انا معاق مثل ما تشوف قال لي والله ممنوع، بلعت الرد غصبن على اللي جابوني، وتحاملت على نفسي بإرهاق كاهل عصاتي، وقلت يا ولد اصبر كلها كم دقيقة وتخلص.
ايه نسيت لاقول لكم قلت له سالفتي بالمحل الثاني قال لي: غريبه سيستمنا واحد ليش ما خلصك؟
قلت يقول علق!
نقلته رقمي بحوافره وليس بحذافيره، قالي بعد طقطقت الكمبيوتر نفس كلام صاحبه الاول فيه مشكله، بس هدئ من روعك، سويت لك طلب وراجعنا بعد ثلاث ايام".
المتمولس:" مدرس قبل عصر "كورونا" يدرس اغبياء مدوخينه اخر الحصه رفع واحد منهم يده، ففرح المدرس وقال: تفضل.
قال الطالب: أستاذ انت وين تشتغل؟
وفي هذه الاثناء رفع الشيخ زغلول على مسامعنا اذان الظهر.
أسأل الله العظيم رب العرش العظيم ان يشفي أمير الانسانية.

كاتب كويتي
@aloooyaomm
‏[email protected]