شوارعنا قواطي وقراطيس

محمد خلف الشمري

"صباح الحج والمعلمين اللي بالديوانية متواجدين فل"، قالها الخبير ثم فتح رشاشه بوجه الشايب وقال:" ايه ياحج الطرقه الجانبية لبيتك العامر مالها وسخه كده مش عوايدك، باين يا حج انك مش شايفها، أبقا شيل النظارة السوداء يابو نادية عن عنيك وانت رايح للجامع"؟
الشايب:" ان كنت تقصد المدربان وظهر البيت فهما دايم الدوم متروسين قراطيس وقواطي، لأنهما مضرب هواء ينظفه راجو اليوم وثاني يوم نلقاه مليان"!
الرجل:" هذا دور العمال اللي موزعتهم البلدية للفرجان والحارات"!
الشاب:" اي بلدية وأي نظافة؟ ولعلمكم مديرها حصل على جائزة أفضل مدير بلدية عربي، للاسف اللجنة اللي قدمت الجائزة ظلمت حظها وبختها! وعندي احساس طوله مترين الا ربع ان الجائزة كل سنة لدولة من الدول العربية علشان يرضونهم"!
الشايب:" اجابة على سؤال ابو الرجال، فأقول له: العمال للاسف ما يدلون الشوارع الخلفية ولا الجانبية، لانهم مركزين جل"شعر" جهودهم على الشوارع الرئيسة وخصوصا بالقرب من إشارات المرور، او حولين أفرع الجمعيات والأسواق ومواقفها، وكلهم كوم وواحد اشوفه كل يوم بدربي ان طلعت من البيت ما غير يناظر السيارات كأنه يتابع لعبة بينغ بونغ، وبهم ميزة كل ما مر عليك واحد منهم او مريت عليه سلم عليك، جنه يعرفك من زمان ما ادري وش السبب"؟
الرجل:" حلوه منك يا شيخ ما تدري وش السبب؟ السبب يدورون ما عند الله من عطايا الناس (جزاهم الله خير)، اللي للاسف خربوهم بالعطايا، ولعلمكم انا ماني ضد احد يعطيهم، الله يرزقهم بس من باب أولى يشوفون شغلهم، وان حصلوا شي من احد عليهم بالعافية، لان المطلوب من وجودهم هو تنظيف كل الشوارع الرئيسية والداخلية من تراكم القواطي والقراطيس، ومن خلال هذه المقالة احمل المسؤولين عنهم مسؤولية وساخة الشوارع وتكاسلهم"!
الشاب:" وانا معـاك احمـل المسؤوليـن المسـؤوليـة، بـس، وهذي تحتها كم خط، هل العمال يأخذون رواتبهم بشكل دوري من قبل اللي مشغلهم"؟
بعد ان لف ودار السكون بالمكان قال ابو الشباب:" للاسف لا وألف لا، لانهم لو ياخذون أجرهم جان ما مدوا يدينهم للناس وتكودوا بالإشارات، للاسف يالربع هذه حال كل العمالة بالبلد، يكرفونهم كراف ولا يعطونهم شي، وعاد ياليت المبلغ مجزي"!
المتمولس:" فيه ناس"الزلف" بالحياه مثل القرض تستانس معاهم اول ما تعرفهم، وبعدها تتورط وتبتلش فيهم"!
وفي هذه الاثناء رفع على مسامعنا الشيخ زغلول اذان الظهر.

كاتب كويتي

‏[email protected]