طرد واصلني من ديك رومي!

محمد خلف الشمري

"ديك رومي أجل اسمها ديك رومي، يسعد لي جوكم الرايق على هالصبح، يا وزارة المواصلات وقطاعاتها، واه يا وجع رأسي"! المعاق:" العلم يابو الشباب، وش مناسبة عزيمة الديك الرومي هو عيد الفصح قرب"؟
الشاب:" عزيمة عيش يا اخوي؟ انت كل همك على بطنك! السالفة وما فيها، الأهل حفظهم الله أرسلوا لي كرتون أغراض بالبريد من تركيا، وهم يقولون ابو علي وابو مشعل ما هم أحسن منا، بعشرة ايام وصلت حاجتهم، وحنا ان شاء الله اسبوع. ويوم أني سألت وين اروح قالوا لي روح بريد الصديق ما هو الجهراء! خطفت رجلي ورحت للصديق وبريدها، وبعد وصولي الميمون بالنعناع، سألت عن كرتون الطرد اللي صار له خمسة وعشرين يوما؟
قالوا: عود يالنشادي ما جا الصديق بالمرة (وانشد شمر وانشد علوه)، انطر لما حنا نتصل فيك أو تجيك رسالة! او يالحبيب بدل العنوه ادخل على هالموقع، واستعلم عن حاجتك لين توصل، قالتها الموظفة مشكورة!
أخذت خطوتين للخلف وعطيتها مقفاي على عجل بعد الشكر والثناء، وعلى هذا الأساس دخلت على موقعهم استعلم، وإذ بي تولف أتفاجأ باسم البلد المرسل منه بان اسمه ديك رومي، بدل تركيا، بس للأسف ما هم حاطين نوعه، هل هو ابيض او بلدي او حبش"؟
الخبير:" يابو الشباب تصير بأحسن العائلات، ولهذا تأكد من جديد بالدخول على الموقع وحنا شهود".
الشاب:" حاضر وخلوكم شاهدين، بِسْم الله، ندخل على البوابة الالكترونية الرسمية لدولة الكويت...ونحط على بريد الكويت متابعة الشحنات البريدية اللي طلب منا رقم الشحنة، وعقب ما حطيت الرقم شوفوا وش يطّلع، وانا راضي بحكمكم! وزيادة بالتأكيد خلو التليفون يلف علينا واحد... واحد عشان تقرأون وش يطّلع لنا جدام اسم البلد المرسل؟ وبعد ان أخذ التليفون لفتين قال الجميع بصوت واحد: اي والله بلد المرسل ديك رومي كااااك"!
الشايب:" اخاف اللي حاط الاسم بالترجمة جوعان"؟
الرجل:" لا والله يا حجي هذا اسمه عدم احساس بالمسؤولية وعدم مبالاة! وسؤالي البريء وين جيش المستشارين والخبراء والمديرين والمراقبين، ورؤساء الأقسام بالوزارة عن هذي الهفوه غير المغتفرة، والا الجماعة شادين حيلهم بالركض وراء تثبيتهم بالمناصب اللي اغلبها براشوتيه؟ يعني مو كافي ان البريد وخدماته بالكويت متخلفة! وحاجتك ما توصلك الا بعد كم شهر، هذا إذا ما رجع للمصدر المرسل، يطّلع لنا ديك رومي! على العموم ديك رومي أبرك من بط ووز وربنا يخلي لنا الست هانم بركة"!
المتمولس:" انا لازم أحد يخوني عشان أحزن، لان مو معقولة اسمع أغاني حزينة وارقص"! وفي هذه الاثناء رفع على مسامعنا الشيخ زغلول اذان الظهر.

كاتب كويتي
‏[email protected]