"قهقة في قلب لا يفقه"

محمد خلف الشمري

"باقولك ايه ياخبيرنا، اترك عنك الجريدة وشغل لنا التلفزيون". قالها الشاب: "خلنا نسمع اخر اخبار المطر من استعدادت ومشاكله بالبلد اللي بنيته التحتية خربانة منذ مبطي"!
الخبير:" وهو كذلك بالزمالك المايك معاك يابو الشباب، شنف ودانا بالاخبار اللي مكتوبة بالشريط الاخباري، لان محسوبك ما بيشوفشي الخط الصغنن"!
الشاب:" لاحول ولا قوة الا بالله، من اولها مناشدات ودعوات لأخذ الحيطه (ثلاثه) والحذر بكل المحافظات، وتغيير مسارات للشوارع لغرق انفاقها بالكامل، وصور انهيارات أرضية وسيارات غرقانة واهلها فوق قمارتها (السقف)، وحاويات تمشي بين الازقة.
بصراحة الوضع صعب(اللافي الله يرحمه) للغاية، وللاسف فيه بلاغات عن حرايق، وغرق سراديب بيوت، وانقطاع للكهرباء، نسأل الله ان الوضع يعدي على خير مدام (هويدا) البنية التحتية من غير تجديد وصيانة"!
المعاق:" يعني الوضع ما تغير، المشاكل مثل كل مطرة؟ ولكن هالمرة بزودكم ملي، وللاسف رغم هالهفوات المتكررة لا يزال البعض متمسك بكرسيه(ما عليه خوف)، والله العالم انها الى يوم القيامة"!
الشايب:" والله المسؤولين ينطبق عليهم مثل حجازي طرا على بالي بالساعة هذي وهو "قهقة في قلب لا يفقه"، دام الأمور تدار حدر شعار هذا ابيه، وانت يا هذاك تخسى لانك ماتجينا الديوانية!
وقهقة في قلب لا يفقه ما ادري الى متى يسكتون عن ولدهم (المدلل) المخطي، ويحملون اي مشكلة للي يشتغل صح، وخير دليل ما يتوزر مرة ثانية؟
قهقة في قلب لا يفقه، يوم انك تشوف ان الباطل هو الصح، لان صحابه يخافون من صوته عالي الفولت، وراعي الحق يركبه الخطأ من راسه لكرعانه!
قهقة في قلب لا يفقه، عندما يتم طناش كل السوس (راضين بمعجون وفرشه) اللي ناخر الوزارات والمؤسسات الحكومية نخر! اما خوف من نبش الدفاتر او هم دافنينه سوا، ونكتفي بهذا الجدر اللي انترس ماء من القهقة في قلب لا يفقه وسلامتكم".
الرجل:" وعليكم السلام، بس يا حجي ما فهمتنا معني قهقة في قلب لا يفقه، لاني ناسي الكتاب بالبيت"!
الشايب:" حقكم عليَّ، مثل "قهقة في قلب لا يفقه" يقصد فيه الكلام والنصح ضايع بواحد "راسه مستطيل"، ما يفهم وش تقول، لانه قاطع على أمره، ومسير الامور تحت نظام حدره بدره قل لي ربي عد للعشرة، واحد اثنين ثلاثه اربعه خمسه"!
المتمولس:" اهداء للراتب المتنتف"ابطيت عني وانت خابرني ابيك...مدري تقيس الشوق والا تغلا"؟
وفي هذه الاثناء رفع على مسامعنا الشيخ زغلول اذان الظهر.

كاتب كويتي

‏[email protected]