كم حالة "خرعة" مؤكدة عندنا؟

محمد خلف الشمري

بعد دخول اخر الحضور من باب الديوانية رحب الشايب فيهم واحدا واحدا وقال للخبير ارحب بالشخصية النادرة ليتك تسكر الباب معاك يا سعادته.
الخبير: مرحبا ألفين يالدولة المستقلة ليكم وحشة يا جماعة واحنا بنتحدى الظروف والطوابع! وياريت كل واحد يحافظ على المسافة القانونية بيناتنا ولكم جزيل الشكر.
المعاق: حسستني انك تبي تشوت فاول "عد عشر خطوات" وقاعد تحرص على الحيطة.
الشاب: ما هو قطع لسالفتك يابو الرجال وآسف على سحب المايك منك يالكوكب الدري بس الوضع ما يحتمل كثر سلامات! انا اقترح بان ندخل بالموضوع مباشرة واليوم ما عندنا غير سالفة قلة المادة وغلاء الأسعار وتسكير اغلب المحلات "بلا داعي" وزحمة الناس بكل مكان وقل ببعض الحاجات والمحتاجات وكل هذا دبل الأسعار علينا يا مستهلكين!... والبركة بتسريبات "اشاعات" لبعض غير المسؤولين عن الأمر اللي يروجونه ليل ونهار بتطبيق الحظر الكلي بالبلد لين رجوا الناس رج! على فكرة الوضع هذا مادري منهو اللي يتحمل مسؤوليته؟
الشايب: يحضرني بهالمناسبة سالفة سمعتها قبل كم يوم عن شايب اكبر مني بدفعتين بالزمن الفايت ابلش عياله يبيهم يزوجونه! وهذا حالة كل يوم ما خلى واحد من جماعتهم وإلا اشتكى له عناد عياله بتزويجه! ومثل ما يقولون كثر الدق يفك اللحام انفك لحام رفض عياله وزوجوه بناء على طلبه دون تحمل أدنى مسؤولية! قام الشقردي أصغرهم ووداه لسمكري أوادم يعدل بعض عيوب الزمن فيه بصبغ ودهان وقص شعر وختمها بجلسة مساج طقطق عظام السنين فيها! ما اطولها عليكم الكراج قصدي الصالون طلعه يلق لق ومن ثم لبسوه احسن الثياب وأفخر بشت مع رشة عطر! وبعد السلامات من الاحبة والأصحاب "استغراب.. استهجان.. تعجب" والعيال زفوه احلى زفة على العروس الجديدة!
وأول ما اصبح الصبح دخلت الحريم على العروس يستطلعن امر عريس السعد والسعود! وكان الجواب صادما اذ قالت لهن: بطرق "غزرها سوالف" الغزوات الليلة راحت!
غزينا الفريج الشمالي اللي هناك أخذنا حلالهم... وعقبها غزينا الفريج الجنوبي وأخذوا حلال الشماليين وحلالنا فوق البيعة بعد ما مردغونا!
وردينا غزيناهم بعد أسبوع وكسرنا خشومهم... وهم ماصبروا الا ثلاثة أيام وهجدونا ويا ويلك ياللي تعادينا ويل!... وهذا حاله طول الليل ما غير يسولف ويهذر عن بطولاته الزائفة مع طواحين الهواء.
الشاب: والله سالفتك يالأسطول البحري تدل أهلها وهي ووارده "تنطبق" على اللي يدير أمور الأزمة اللي حنا فيها من اكثر من شهر. المتمولس: عاجل عاجل ظهور وباء جديد اسمه الإفلاس.. يا ترى كم حالة، مؤكدة عندنا حتى الان؟.. وفي هذه الأثناء رفع على مسامعنا الشيخ زغلول اذان الظهر.

كاتب كويتي

‏[email protected]