"ما عندكم إلا الضعوي"!

محمد خلف الشمري

"لفت انتباهي قبل كم يوم سؤال حيرني زي ما حير اللي سأله"، قالها الخبير ثم اضاف :"السؤال في محله ثاني دكان على اليمين، حيث كان السؤال حول وباء "كورونا" في الكويت، واشمعنى ينتشر بالبلد على حسب إفادة وزارة الصحة، وليه ببعض الدول الأجنبية ودول الجوار تم افتتاح اغلب المرافق العامة امام شعوبها تدريجيا واحنا لا"؟
الرجل:" الناس هذي ملتزمة بالقرارات على عكس ربعنا ابو عناد وشلته".
الشاب:" اي والله اشمعنى هم وحنا لا، اموت واعرف طريقة تعاملهم مع هذا الوباء وطريقة تعامل جماعتنا، وما أحط بذمتي لان ما هي ناقصه ان الحسابة تحسب كل ما طالت الأزمة"؟
المعاق:" بالاول خلونا نعرف طريقة ربعنا وتعاملهم المبهم، وبعدين نسأل عن الدول الثانية".
الشايب:" طريقة تعامل ربعنا مع الأزمة اقرب وصف لها هالسالفة اللي راح اقولها لكم بدون مقاطعة القطيع من احد، يقولون خرج رجل من احدى قرى بلده راكبا جمله رايح البر يجيب العيش الأحمر، قصدي يسترزق الله بحطب يبيعه بالسوق يعيش فيه عياله وأمهم، وفي طريقه التقى ببدوي ماني معلم بقبيلته، يمشي على رجليه محمل جمله كيسين كبار وباين التعب على البعير، تخاوو بالدرب ثم سأله: وش انت محمل على ظهر جملك؟
قال البدوي: محمله عدل عيش والعدل الثاني تارسه رمل بعين العدو للتوازن، أناخ الرجل الجمل وفك الحمل وكب عدل الرمل بالأرض، وعقب ما نظفه من الرمل، قسم الرز بين العدلين، وقاله اركب جملك بدل كانت ماشي على رجليك.
استأنس البدوي من فكرة الرجل ثم سأله بالله كم تربح من فطنتك(ذكاءك) هذا، وكم عندك من المال؟
فقال الرجل:ما عندي الا الضعوي والذياب اللي تعوي، راس مالي هالجمل اللي انا راكبه.
صكت الدنيا بوجه البدوي فتشاءم من ذكاء الرجل، وقال: امحق من فقري انا يالخوي حلالي ما تشوف أوله من اخره من كثره، تدري اشلون رجع الرمل للعدل، ودعني امضي لحال سبيلي.
- غير بدل جرب انا طالبك اتركه هالمرة.
- والله ما يقوم بعيري إلا رمله عليه.
وهالسالفة هي الوصف المناسب لتعامل دولتنا الحبيبة، اعزها الله مع هذا الوباء، الله يخلصنا منه اليوم قبل باجر، ودمتم سالمين غانمين، وقبل الختام أعطى المايك للمتمولس".
المتمولس:" حبي لك كصاروخ باليستي، وقلبك كشبشب بلاستيك لا يبالي باللي جرالي"! وفي هذه الاثناء رفع على مسامعنا الشيخ زغلول اذان الظهر.

كاتب كويتي
aloooyaomm@
‏[email protected]