وين رسايل "اس ام اس" التحذيرية يا حكومة؟

محمد خلف الشمري

"دخل الرجل الديوانية وكان الوضع كما يلي الشايب يلعب بالرمونت كنترول وهو مضطجع، أما الخبير فكان منشكح يدندن بكلمات اللي عرفتها منها انا... انا... انا ما اقدرش على كده ومقام السيدة!
ثم قال: خلوا السيدة ومقامها، وقم يا حجي شف لك صرفة الحمام، اعزكم الله، ما فيه ماء؟ طلع الشايب، وما هي الا دهوتا من الزمن ثم اكد على كلام ابو الرجال بقوله: ايه والله الدرام فاضي، من عنده علم يدلو بدلوه ورشاه علينا"؟
المعاق: "الماء مقطوع عن مناطق المحافظة من البارح وامس"!
الشايب: "وهم الله يهديهم وراهم ما يبلغونا علشان نترس سطولنا وجدورنا؟ بالله هذا كلام رائحة الحمام (هات العطر ياولد) واصله لمجلسنا"!
الشاب: "البلد للاسف متخلف، ولا يهم المسؤولين فيه امر العباد والبلاد، متى ما اشتهوا يقطعون الماء والكهرباء وبحجة الصيانة الدورية قطعوها"؟
الخبير: "اللي اعرفوه بالدول المتقدمة وأميركا، وبالشارع اللي ورانا هناك تواصل بين الحكومة والشعب برسائل هاتفية "اس ام اس" تحذيرية لكل امر طارئ، لتسهيل إيصال المعلومات ليهم (إنكليزي وعربي) في اي مكان وأي زمان، مثل توقع العواصف والامطار، أو انقطاع الكهرباء والماء، أو أمر ملح وفلفل"!
المعاق: "هذا عند الناس اللي تقدر قيمة المواطن، أما ربعنا ان كلمت احد فيرد عليك ويقولك والله حطينا بالتويتر، وكأن تويتر هو الناطق الرسمي لهم"!
الشايب: "طويطر وش يطلع، بالله هالوجه وجه طويطر؟ الا الحق ركب الجماعة ركوب من قمة رؤوسهم الى أظافر كراعينهم ومقام السيدة"! الرجل: "حر وغبار والماي مقطوع، صج مغثه من أمها وابيها، ولهذا ابصم بالعشرة على كلام الحجي، واحمل المسؤولية للحكومة ووزرائها، بالله وإذا راعي تويتر الجديد ركب راسه وحجم بعض مميزاته وشنسوي؟ علي هالوضع المزري ابو ريحه اللي اعطن ديواننا العامر، وبيوت الشعب بيت بيت وزنقه زنقه".
المتمولس: "افتح الآلة الحاسبة واكتب 82 ونقص منها عمرك وزود عليه 1940 راح يطلع تاريخ ميلادك"! وفي هذه الاثناء رفع على مسامعنا الشيخ زغلول اذان الظهر.
$ كاتب كويتي

‏[email protected]