الأربعاء 21 مايو 2025
39°C
تم نسخ الرابط بنجاح
خالي ترعة المفهومية
"اشوف يا المعاق ما تشاركنا عسى ما شر ليكون زعلان علينا"؟
"والله يا حجي ما تعطونا فرصة انت والخبير، كل ما بغيت اتكلم دخلتوا بموضوع غير اللي انا محضره"!
الخبير: "استلم المايك بس متقرصش عليه كثير لانه بنايلون، اخاف يدوب بنص حكايتك، هذا للعلم والمفهومية، من واحد عايش بين المايكات"!
المعاق: "ما توصيش حريص، راح اعامله بكل حنية"!
الرجل: "انجز علينا بسالفتك قبل نقوم، ونخليك"!
المعاق: "عندي سالفة من تراث خالي، الله يخليه لي، بيوم من الايام، وقبل لا اتزوج قمت أفكر باللي حواليني، وعيشتهم هم وحريمهم!
ولله الحمد هداني تفكيري البسيط ان خلخل هو المثال الطيب، اللي راح احتذي فيه، خطفت عكازتي وطرت لبيته، وقلت له يا خال انت متزوج من سنين، واللهم لا حسد ما قط، ولا فار، سمعنا عن مشكلة بينك وبين خالتي، ما أدرى ما هو السر بذلك؟
جاوبني وقال: ايه لا كان بص يالبناخي، انا وام سرور اتفقنا من اليوم الاول أنها تعطي رأيها في الأمور الصغيرة، وأنا يا خالك أعطي رأيي في الأمور الكبيرة!
قلت يا خال: وضح لي الصورة، لان بناخيك عقلاته نونو مش هذاك الزود!
قال: اسمع ام سرور لها السلطة، وبابا غنوج، في شراء البيت، واختيار الأثاث، ولون الغرف، وتنسيق الورد والأزهار والنخل في الحديقة، وماذا نأكل ونشرب، وهي تربي الوراعين، وانا اغسل مواعين (دعابة)، وتستلم الراتب، ولها مطلق ضيدان الحرية بالصرف، ووين نروح، ومن نزور، ومن يجينا، وعلاوة سنوية على هذا الريموت كنترول ديال التلفزيون، بيدها والخ... الخ"!
قلت يا خلخل: "العذر والسموحة، وانت وش دورك لاين مان"؟
قال: اوه... اوه، يا كثر صلاحياتي، سجل عندك يالبناخي، انا بلا صخل قصدي فخر، اعطي رأيي في الامور الكبيرة والخطيرة مثل العلاقات الايرانية- الاميركية، والحرب الروسية مع اوكرانيا، وأزمة سد النهضة، وتداعيات الربيع العربي، والعلاقة بين الدول العربية، وتغيب دور مجلس الامة، وايضا عندي اطلاع وفهم عجيب للتغير المناخي، وثقب الاوزون، يعني يالبناخي انا خبير ستراتيجي دستوري ماركة فرق تسد على أربع شوارع، وسلامتك، وانا اقول قم لا تجيك رفسة جامحة من خالك ترعة المفهومية".
المتمولس: "بداخلي زحمة حزن من الوضع الراهن بس لله الحمد سويت اشارات مرور، وكم كبري، ونفق، وضبط الوضع"! وفي هذه الاثناء رفع على مسامعنا الشيخ زغلول اذان الظهر.
كاتب كويتي