الخميس 30 أبريل 2026
30°C
تم نسخ الرابط بنجاح
يدا بيد من أجل بلاليط أفضل
"يقولون بيوم من الايام غير السعيدة بقرية بلاليط، تهاوش اثنين من الإخوة في بيتهم، وبحضور ابوهم، اللي كان ساكت ولم يتدخل بهذا الشجار! ما غير كان يناظرهم من فوق نظارة القراءة، وهو يقراء الجريدة.
وبعد تدخل امهم وأخواتهم تم فض التشابك اللفظي، وكل واحد منهم دخل شقته وأصدر فرمان فوري للزوجة والعيال بعدم السلام على عيال اخوه!
لدرجة انهم قاطعوا سفرة الأكل ما يبون يشوفون بعض، وكان الأب يشاهد بصمت الأحداث دون التدخل!
بينما كانت الأم تتألم ودموعها اربع ...اربع، لكن ما بيدها حيلة، تطلب من ابوهم التدخل، وهو معطيها طاف، اذن من طين وإذن من عجين!
وللاسف تطور الخلاف بعد ان جند كل منها مواقع التواصل الاجتماعي من "اكس" و"سناب" و"انستاغرام" و"تك توك" و"واتساب" بأسماء وهمية لصالحهم بالنيل من سمعة بعضهم بعضا.
عندها قرر الأب التدخل قبل خراب مالطة وشارعين من صقلية، ووضع خطة ذكية بواسطة الذكاء الاصطناعي ما تخرش الميه!
فذهب الى ولده الأول اللي كان يشتغل مزارع وقاله: اخيك طاح في احد آبار السليل، ويا بوك ان كنت تحبه رح أنقذه! ترك اللي بيده وعلى طول طار الى شعيب السليل، وقم يالشايب ورح لولده الثاني، اللي يعمل نجار بالقرية، وقله نفس السالفة!
ابن الحلال اللي اول ما سمع الخبرية صاح بأعلى صوته باسم أَخِيه، وهو يبكي خوفا عليه، ويقول لا بارك الله بالشيطان وعواله!
ما لكم بالطويلة تقابل الأخوين عند عين الماء، وهووووبا حضنوا بعضهم بعضا، بمشهد ما تشوفه الا بالافلام الهندية، بموسيقى تصويرية من كمان بيد الأب يعزف منه لحن حزين ابكى عيون اهل القرية، وطوايف الاخوان، اللي كانوا حاضرين هذا المشهد الدرامي! وبعد السلامات والاعتذارات وسيل من القبل الأخوية قال الأب: بخطبة صغيرة: مهما كان حجم الخلافات كبير ما لكم الا بعضكم البعض يا عيالي، وبالأخص وقت الشدة والكسرة. ويالله يالمتمولس انزل بستارة الختام، وياليت ترددون معي لا للعنصرية، والسلوك الفوقي بين أفراد مجتمع قرية بلاليط وسلامتكم".
المتمولس: "أمس مرني لهيب الشوق، وسويت عليه كبسة حاشي"!
وفي هذه الاثناء رفع على مسامعنا الشيخ زغلول أذان الظهر.
كاتب كويتي
