الخميس 09 مايو 2024
29°C
تم نسخ الرابط بنجاح
واضح أن الصنف مضروب
"اول ما دخل الشايب الديوانية، وقبل لا يأخذ مكانه بصدر المجلس، قال: حسمت... حسمت، ولهذا يسعدني، ويؤنسني ان أزف لكم الخبر اللي الكل ناطره على أحر من جمر هالشيشه، اللي مالها صاحب بباب الديوانية!
خوذوا العلم الوكاد من بابا عود ابنائي الأعزاء شكرا، حسمت مثل ما جاني الخبر".
الرجل: "الله يبشرك بالخير يا حجي، بس هي شنهي اللي حسمت؟ اخاف معالجة وزارة الكهرباء للازمة المُحتملة لهذا الصيف"؟
المعاق: "يمكن يقصد بحسمت اعلان تخصيص تيماء والصليبية، قبل لا يخلص توزيع جنوب مدينة سعد العبد الله، اللي راح يسحبون عليها اهل الطلبات"؟
الشاب: "انا أتوقع اللي حسمت هي دخول الكويت اللي نايمة بالعسل بتحالف الطريق (التنمية) الجديدة مع الإمارات وتركيا وقطر والعراق، بخصوص معاهدة ميناء الفاو"؟
الشايب: "للأسف كل توقعاتكم خطأ بخطأ، ولهذا حاولوا مرة اخرى، لعل و"عسل" احد منكم يصيب كبد اللي اقصده"!
الشاب: "الله والعالم، تقصد ان الوزير المختص أقال اتحاد الكرة برمته، بعد ان تعددت هزائم الكرة الكويتية بجميع المحافل؟
وللأسف الهزائم بجميع المراحل السنية على العشب الأخضر والصالات، وما جورها مثل ما أقال رئيس هيئة الشباب والرياضة، على حدث يبي يصير بعد ثمانية أشهر".
المعاق: "الله، وأخيرا من وجهة نظري اللي ما تعدى جدران هالديوانية، ان اللي حسمت هو موضوع تلف وتدور شوارع الكويت اللي تعاقب (تتالى) عليه حوالي عشرة وزراء، وثلاثة رؤساء، والرابع توه حالف بسماها، وترابها، وأبوابها"!
الرجل: "وانا رمعتي ان اللي حسمت، هو التقليل من كثرة سياكل الدليفري اللي جننتنا بطيرات سواقها بالشوارع، وبين السيارات لدرجة ان الواحد ترك الطريق، وقام يراقبهم، لا يلبسون بسيارته، ومن ثم يا عمي شايلني"!
الخبير: "يا ناس ياهووو الحاج من دقيقتين بس راح لبيت الراحة اعزكم الله، هو جاب الخبر منين؟ باين والله اعلم كما قالوا بالأمثال دخول الحمام مش زي خروجه، وواضح يا حاج ان الصنف مضروب!
ولهذا باقترح عليكم اعزائي بمقاطعة هذي المهاترات، والمتاجرة بإثارة الناس، ومن مكاني هذا أدعوكم بمقاطعة الحاج، وكل قنواته التحريضية وسلامتكم".
المتمولس: "لا حبيب يحس فيني ولا صديق يواسيني... أحد عنده غنم يدور لها راعي"؟
وفي هذه الاثناء رفع على مسامعنا الشيخ زغلول اذان الظهر.
كاتب كويتي