الخميس 30 أبريل 2026
30°C
تم نسخ الرابط بنجاح
طليان "بانورغ"
"هاه يابو الشباب وش اخبارك مع الكتب، اللي مضيع مصروفك عليها"؟
"كله يهون لأجل الواحد يثقف نفسه واللي حواليه"!
الشايب: "بارك الله فيك وبعلمك، وياليت تقولنا شي من اللي قريته، على الاقل نباهي فيك جدام الخبير، اللي مفكر نفسه الكل بالكل"!
الشاب: "عندي اليوم سالفة من الأدب الفرنسي، وهي بعنوان "عقلية القطيع"، امل حجازي انها تحوز وتفوز برضاكم نفر ...نفر!
روى الكاتب الفرنسي فرانسوا رايلي قصة رجل ينقال له "خراف بانورغ"، كان في رحلة بحريّة على متن سفينة، وكان على السفينة نفسها تاجر الاغنام دندونو اللي وصفه، الأديب سالف الذكر، أنه يمثل أسوأ تجار عصره!
وكان معاه قطيع من الغنم لبيعها بإحدى البلدان، ما أطولها عليكم، قول طول، صار شجار على سطح المركب بين بانورغ، والوجه الودر دندونو، وعقب ما فرقوهم الحجازه قال بعقل باله بانورغ: هين راح اوريك اللي ماقط وفار شافته عينك بس تمهل!
وبعد تفكير طويل قرر انه يشتري "المرياع"، الخروف الأكبر، من التاجر بسعرٍ ما حلمت به أمه بليلة عرسها!
وعقب ما تمت الصفقة، وبمشهد غريب جر بانورغ "المرياع" من كراعه وراح قاطه بحر! وما هي الا ثواني تتالت الغنم واحد تلو الاخر، وهي تهتف اما حياة تسر الصديق واما ممات يغيظ العدا! الموت الموت لأجل عينيك يامرياعنا، وكل هذا وسط ذهول التاجر وصدمته! اللي حاول منع باقي الغنم لكن رغبة الانتحار انتصرت عليه!
حاول وتحايل على اخر الخرفان لكن الخروف كان صاحب عقيدة وغرق التاجر معاه! ومن خلال احداث هذه القصة صار تعبير "خرفان بانورغ" مصطلحا شائعا في اللغة الفرنسية، ويعني انسياق الجماعة بلا وعي أو إرادة وراء آراء، أو أفعال الآخرين وسلامتكم".
الخبير: "يسلم بؤقك يابو الشباب، جبتها على الجرح، وللاسف ده اللي احنا شايفينة اليومين دول، واللي قبليهم من خلال منصات التواصل الاجتماعي "الشوشو ميديا"، بعد ان انساق بعض الشباب انسياقا بلا وعي زي خرفان بانورغ خلف ابو الأكباش، اللي يدفع لهم ويسهل أمورهم"!
المتمولس: "انا ما يقهرني الا يوم يحطون على علبة الفليت تاريخ انتهاء"، يعني خايفين على الصرصور يعوره بطنه مثلا"؟ وفي هذه الاثناء رفع على مسامعنا الشيخ زغلول اذان الظهر.
كاتب كويتي
