الخميس 30 أبريل 2026
30°C
تم نسخ الرابط بنجاح
تباعد اجتماعي ما هو تواصل
"حدثني أحدهم بقصة عجيبة حصلت له"، قالها الرجل ثم اضاف: "يقول صاحب السالفة أمس انقطع الانترنت من البيت بسبب ما نجهله! قلت لعلها خيرة، خلني اطلع من الديوانية للصالة أتفقد احوال اهل بيتي اللي مالي علم بأخبارهم!
وانا جالس نزل ولدي الكبير من شقته، واول ما شافني أخذني بالأحضان، وجلسنا نسولف مع بعض، وسألته بشر أبوك الله رزقك بعيال؟
قال: لله الحمد، الله رزقني ولدين وبنت، وابشرك الولد الكبير سميته على اسمك! الله يصلح ما أعطى، والله لك وحشه يبابا بس ما شاءالله شكلك ما تغير كثير عن أول، ما غير شيبك كثران، فديتك بابا عطني اخر علومك وحركاتك؟
بس والله غريبة اليوم ما رحت للدوام ماهي من عوايدك؟
ما غريب الا شوشو وانجاله، وفجأة بلا مقدمات باب غرفة ام العيال له صرير، وما من بطى والا اشوف امهم طالعه!
اللي انصدمت من شافتني، وقالت بدلع: بابا ايه... بابا ايه... بابا اهو بابا جه من الدوام!
قلت: وش اخباري انا طالع تقاعد من ثلاث سنوات، وناطر وعدهم بالزيادة! بس انتِ ما شاءالله، وكأن الزمن ما له شغل فيج ولا مر عليج!
وأثناء تبادل السلامات والأشواك (بالكاف) والتورتات وحلو بيض الصعو، طلع اخر العنقود اللي بالمتوسط من داره، وأنضم للحفلة!
بصراحة كنت طاير من الفرحة طاير، وحشني شوف اهل بيتي، ما شاء الله الولد الكبير صار عنده غويش (اولاد)، والجعدة تخرج من الثانوية وصار ذيخ!
وبهذي المناسبة الحلوة، اقترحت ام العيال نتغدا سوا، لكن على قولة الست أنغام: يا خسارة... يا خسارة الحلم ما يكملش، يا خسارة يا خسارة انقطاع النت، ما طولش لان إشارته رجعت سلمنا، على بعض وتوادعنا، وكلٍ دخل صومعته!
مع ان كان في خاطري نأخذ صورة جماعية لنا للذكرى، بس اخر العنقود قال يا حجي: ما فيه وقت السيرفس رجع!
ولهذا اقترح كل واحد يأخذ صورة سلفي لنفسه، وترسلونها لي وانا العب فيها بالفوتوشوب، والذكاء الاصطناعي، واخليها صورة جماعية ابروزها وأوزعها عليكم كادو (هدية) وسلامتكم".
الخبير: "للأسف الوضع اللي اتكلمت عنه يابو الرجال الكل بيشتكي منه، لان مشاعر وأحاسيس الناس أصبحت على الشاشات وبس (وخذلك خسايه قرقشها)، وهم بالواقع غرباء متباعدين، وان كانوا ساكنين ببيت واحد، وانا باقتراح بتنظيم العملية لان ما يصحش مواقع التواصل الاجتماعي تأخذ كل عقولهم، ووقتهم".
الشايب: "كلامك صحيح يا خبيرنا، نسأل الله العافية والسلامة لهم، والله مصيبة هالاجهزة اللي صارت تباعد اجتماعي ما هي تواصل اجتماعي".
المتمولس: "سؤال بريء: من جد اذا كان الواحد قصير يطلعون رجليه بصورة الهوية او لا"؟
وفي هذه الاثناء رفع على مسامعنا الشيخ زغلول اذان الظهر.
كاتب كويتي
