الخميس 30 أبريل 2026
30°C
تم نسخ الرابط بنجاح
أخي الحاج چابل التلفزيون أرخص لك
"كل عام وأنتم بخير يالربع كلن باسمه، وحج مبرور وسعي مشكور إلك يا حجي"، قالها المعاق.
"وانت بخير ومن يسمع، ويقرأ بألف خير يا ولدي الفال لكم".
الخبير: "مبروك ايه، ومبرور على ماذا يا اخوان، الحاج ببيته ما طلعش قيد انملة، أنتم منين بتجيبوا الاخبار النص كم دي"؟
الشاب: "عيل ليش التغلي، عيل وينه، وليش مسكر ديوانية، وما شفناهوش من أسبوعين بالتمام و"الكمان"؟
الشايب: "ما نسولف احنا وايد بلابلا، هالمرة الشغل جايد بلا بلا ، يابوك حركات، بالله عليك منهو اللي يقدر يحج بسنينا الاخيرة؟ شنهو ما عندك خبر بالأسعار اللي مولعه نار اكثر من حرارة الجو، اللي قاطع الكهرباء عن ثلث الكويت، وحنا بأول الصيف؟ معقولة يا عمامي اقل سعر للحج حوالي ألفين دينار للفرد، والله يكون بعون الجوز؟
بالله منهو اللي يقدر يروح بهالاسعار المبالغ فيها، وخصوصا ان كان عنده بنات بذمته؟
واللي يزيدك غبن وجبن مملح قبل نحرك من الوريد للوريد، هو سكوت الحكومة على هذي الاسعار الفلكية المبالغ فيها؟. ولهذا راح اطرح سؤال بريء: هل الحج صار عبادة للاغنياء ومن جاورهم من السعداء ومشاهير الشوشو ميديا؟
والف مليون الحمدلله ان شوفت المناسك بالتلفزيون ببلاش، والا جان رددنا هيلا يارمانة، وما نسولف احنا وايد ثلاثه واثنين واحد"!
الرجل: "يا عمي بنظرة سريعة على أسعار الحج بالدول العربية والأجنبية، نشوف للاسف الكويت في العالي من بلدان العالم عربيها وأعجميه، هذا وحنا يالله من فضلك ما بينا وبين السعودية الا كم كيلومتر، وتعيش وتاخذ غيرها يا حاج"!
المتمولس: "انا محد مسليني غير اللي يكلمني في مخي، قسم بالله عليه سوالف"!
وفي هذه الاثناء رفع على مسامعنا الشيخ زغلول اذان الظهر.
كاتب كويتي
