لا مو هذي ماربيا مالتنا

"اليوم عاوزين نكسر العود والكمان، اللي احنا شغالين عليها، من كم مقالة لطارق ما خارج الإرادة! وإذا سمحتوا يا حضرات ومن موقعي هذا اطلب من عمي الحاج عبده هذاك بالموافقة برفع صباع كفته، لأني مش ناقص وجع قلب، وفشه، وطحال ولا مزرعة بط".

المعاق:"بالاصالة نصري عن نفسي، وعن اهل الديوانية، اي والله... اي والله نعطيك الأمن والامان، وكوب شاي، وقبلها المايك يا خبيرنا بما تجود به نفسك".

الخبير: "بسبب البذخ والتباهي، واظهار اسلوب حياة من كوكو ثاني (مش مالية عنيها الناس) الصين تغلق بالضبة والمفتاح حسابات مؤثرين على مواقع التواصل الاجتماعي! بعد ان حظرت 8 حسابات لمشاهير ومشهورات، لتفاخرهم بثرواتهم أمام متابعيهم المبحلقة عنيها بكل حصرة، ويسرني ان اقول شابوه (ارفع القبعة)، والاغلاق تم وفق قانون أقر (الفال لنا) يفرض عدم التباهي بالثروة، وإظهار أسلوب حياة فاخر في وسائل التواصل، حتى لا يلحقوا الضرر نفسياً على أصحاب المستوى المعيشي (الدخل المحدود قطعة 1 + 2) الأقل، ويا بلح زغلولي... زغلولي خد الحبايب يا بلح"!

الرجل:"عز يا مال العز، يا ربع شي جين بينغ فعلاً الخيمة جابت رجال، ويارب مع المحظورين اسامي اللي يستعرضون بسياراتهم، وبذخهم، وماركاتهم اللي الله العالم منين جت للبعض منهم، في كان الفرنسية ولندن، وشواطئ ماربيا (لا مو هذي مالتنا؟) حقت الهيلق، والجهال، وقليلين الادب والنحو وبخن بخن يا هزا".

الشايب: "روح معوزك (مالك امل) يابو كرش مدورة، لسانك طويل اه منه! انت ناسي ان ربعنا ما يبون دندره، ولهذا شيل قشك واطلع من ديوانا، لا يملينا دمك يا عنترة، وروح لاهلك ترانا ما نتحمل اي كلمة قشمرة! يابو الرجال مرحى ثلاث مرات، والله لو تجيب حق كوريا الشمالية معاهم ماراح يغير من الامر شي، وأختم بتنويه هذا اليوم وكل يوم، حفاظا على استقرار المنظومة الكهربائية في البلاد، اقطع يا ولد التيار عن اجزاء في بعض المناطق السكنية، ومن باب الذكرى اذكركم بتنقيع الشرشف بالماء والنوم فيه".

الشاب:"ليتك يا خبير ما كسرت العدة، وخليتنا على حكاوي ومراويس عمي الشيخ بالضحاوي على فنجال بن أشقر مبهر".

المتمولس: "بعد الظروف الراهنة وغلاء المعيشة، وتأخر سن الزواج اطالب برفع سن المراهقة، وعلى النبي صلي".

وفي هذه الاثناء رفع على مسامعنا الشيخ زغلول اذان الظهر.

كاتب كويتي

‏[email protected]