شيرين عبدالوهاب: قسما بالله عايزين يقعدوني بالبيت!

وصفت نفسها... " قرش وعندي سنان حامية جداً وبتطلع وقت اللزوم"

كشفت الفنانة شيرين عبد الوهاب خلال مداخلة هاتفية في برنامج الحكاية مع الإعلامي عمرو أديب تفاصيل ومفاجآت جديدة في أزمتها مع شركة روتانا التي تصدرت محركات البحث الاجتماعي الفترة الأخيرة وأكدت شيرين عبد الوهاب أن كل ما قيل حول أزمتها مع شركة روتانا سواء من المحامين وحتى المحامي الخاص بها حديثهم غير صحيح:"اللي اتكلم قال بعد ما خدنا ونضفنا ولمعنا هي وخداني نجمة الوطن العربي، وقسما بالله العظيم كل اللي اتكلم كلام غلط حتى المحامي بتاعي وشيرين عبد الوهاب لو متعملهاش دعاية توازي حجمها دوليا وعالميا يعتبر العقد منتهي وأنا السبب في نجاحي الجمهور واللي بيحبوني سلمتهم أغنية كلها غيرانة نجحت جدا ومتعملهاش دعاية بنص جنيه".

وتابعت المطربة شيرين عبد الوهاب حديثها خلال المداخلة الهاتفية مؤكدة على وجود مؤامرة حولها وأن عدم طرح أغانيها شيء مقصود ومتفق عليه من بعض الشخصيات الكبيرة التي تحاول التوقف في طريقها، وقالت شيرين: "اتعلمت أسكت عشان شيرين بتاعة مشاكل وعايزة أقول لروتانا انتو مستنين الأغنية الرابعة عشان تسألوا عن التنازلات.. أنا كان معايا شخص سلم أغنية ليا لشركة انغامي ومشيته عشان أنا شغالة مع روتانا وكلمت مدير روتانا في مصر وقولتله تبعت انذار للشركة ووقف الأغنية وقاضيهم وخد منهم تعويض لكن بعتولي أنا واخدوا مني 2 مليون جنيه رغم أنه مفيش ورقة يبين اني موافقة"،

ومضت:"ليه أبحث عن شركات أمضي معاهم وانا عندي شركة موجودة والاغاني جاهزة.. روتانا عايزاني حصري في الحفلات اللايف.. وأقسم بالله أن روتانا امتنعت عن استلام الاغاني بسبب ده، وانا بناشد بلدي إني مطربة كبيرة جدا عايزاها تحميني من الكلام اللي بيحصل دلوقتي.. أنا قرش وعندي سنان حامية جدا وبتطلع وقت اللزوم.