الخميس 30 أبريل 2026
30°C
تم نسخ الرابط بنجاح
ما يموت بالربق إلا عيال الغنم
"ما دريتا يا جدو بقى خلي العيال ومدارسها تنفعك، بعد صدور القانون الجديد للمرور، وإضافاته"، قالها الخبير ثم أسهب الأشهب وقال: "الإضافة اللي بتخصك بتقول بان عدم تثبيت الطفل بالمقعد الخلفي إلى جانب عقوبة لترك طفل دون سن العاشرة وحده في السيارة، بدون مرافق بالغ، حتى لو كانت السيارة متوقفة".
الشايب: "حصل لنا الرعب، والله حاله حنا للحين ما هضمنا مخالفة حزام اللي بجنب السايق طلع لنا مخالفة الجهال، يعني وين يبونا نحط الجهال بدبة السيارة مثلا، جهال اوديهم لمدارسهم، واجيبهم، وقافل عليهم الباب بالقفل السري، ومن بكره اربطهم بربق غنم أسلم لي ولهم"؟
الشاب: "شو هالرمسه يا حجي انت تبي تذبحهم"؟
الشايب: "لا تخاف ما يموت بالربق (الحبل) إلا عيال الغنم يابو الشباب".
الرجل: "شلون يعني يبون السايق يقص نفسه نصين، نص يسوق ونص قاعد وراء، يعني افهم من هالكلام ان الجهال هم سبب مشاكل المرور بالبلد؟ تدرون شلون اخذوا الجهال أحسن بعد.
ولهذا اقترح عليك يا عمي الشيخ بانك تأخذ الخبير معاك بمشاوير البزران من والى المدارس، ينوبك ثواب، ومنها يطلع له بمصروف يصرف على نفسه بدل قعدته على الارصفة العصاري يدور شغل، وبالأخير، وعندي سؤال بري، اللي طلع هالقانون (الربق) هل فكر فيه، او درسه قبل لا يعلنه"؟
المعاق: "يعني لا شوارع مثل العالم، ولا تنظيم للازدحام، وكاميرات بكل مكان، وكل خمسين متر مطبه! هم وراهم ما يخذون معاشاتنا، واللي يزود يردونه لنا،ما أدري هم ناسين ان وضع المواطن المالي تحت الصفر؟ الناس يا جماعة الخير وضعها تعبان وماهم ناقصين ادفع".
الشاب: "اصحى يا نايم، باين ان القرارات الحلوة مالها سوق عندكم، لأنكم تعودتوا على كسر القوانين"؟
المتمولس: "سألني واحد عن اعلى قمة وصلت لها في حياتي؟ قلت: هي قمة الفلس اللي انا أكلمكم منها حاليا"!
وفي هذه الاثناء رفع على مسامعنا الشيخ زغلول اذان الظهر.
كاتب كويتي
