الأربعاء 06 أغسطس 2025
38°C
تم نسخ الرابط بنجاح
أنا مو أنا يمكن أحد قبلي!
"في أحد الأيام الغابرة جلست مع نفسي بتواضع، بعد ما مليت من وجوه الربع اللي حتى الخميرة صاروا يقطعونها من العجين، واثناء خلوتي، قعدت أراجع شريط حياتي لقطة لقطة" قالها الشايب، وهو عاصب رأسه بغترته.
وقال: "شفت احلامي، طفولتي، ودراستي، وعملي حتى اختيار دشداشتي ونعالي. وكل لقطة افتحها الاقي فوقها ختم تم الاستخدام سابقا، بدون حتى ما ياخذون رأيي، قلت بعقل بالي: معقولة أنا ما بنيتشي؟
معقولة كل اختياراتي اللي مدمرة حياتي جتني معلبة جاهزة؟شكل الاصلي اللي عاش قبلي، كان يسوي تجارب ويوم ماعجبه الوضع قالي: خذ دورك كمل انت لا هنت، يعني لكم ان تتخيلون ان مشاعري ما أحس إنها لي، ان فرحت الاقي فرحتي مصطنعة، وان زعلت احس ان زعلي مستورد؟
واذكر بيوم اشتكيت لأبوي قلت له: بابا أحس ان حياتي مو لي! قال: عيل اشلون تبيها وكالة؟
الحالة اللي انت عايشها مريت فيها، ترى حتى أنا يوم انولدت عطوني هموم جدك، وقالولي: لا هنت شيلها وخلك رجال!=
قلت له: بس أنا أبي أعيش شي لي خاص فيني، ابي اطلع من جلباب ابي، ما ابي توريث مشاكل وهموم، وخطط اكل وشرب عليها الدهر كاكولا.
ضحك وقال: يا وليدي كلنا نبدأ بحياة فيها بصمة غيرنا، والذكي هو اللي يعدل المقاس، ويفصل على كيفه ويطرزها بطموحه.
قلت له: هو الخيط وينه؟
قال: يمكن الخيط داخلك، بس إنت للحين ما فتحت بكج نفسك! زبدة الحچي إذا حسيت إن حياتك مستعملة، لا تبلش من ورثها لك، كل ما عليك افحص نيتك، وابدأ الترميمات والتعديلات فوراً، ولا تنطر أحد يعطيك كرت سعادة مدى الحياة، لان انت الطباخ، وانت اللي تضيف البهارات، نصيحة لك يا بوك شب النار وخلها تشوي كأبتك".
ضحك الرجل وقال: "يعني يا حجي تقصد ألبّس لبس ما هو لي، وأقول عنه موديل السنة"؟
دخل الشاب الخط وقال: "يمكن يا حجي بس تحتاج تسوي "فرمتة" لنفسك تشيل فيها الملفات الزايدة، وتبدأ من جديد بنسخة محدّثة من شخصيتك".
ضحك الخبير وقال: "على كده يا حاج منخوليا، المفروض ان الواحد اول ما يكبر ويعدى ثانوي، يدور على زر الريستارت ويضغطه"؟
المتمولس بابتسامه كلها خوف قال: "الحياة مثل الباب لا تثق ابدا بالقطط، لان الشمس لا تستطيع السباحة"!
وفي هذه الأثناء رفع على مسامعنا الشيخ زغلول أذان الظهر.
كاتب كويتي