حتدفع يعني حتدفع وإن كنت ناسي أفكرك

"دخل أبو الرجال الديوانية، وهو زانط كوب القهوة، كأنه شرطي ماسك حرامي من علباه! تنهد تنهيدة طويلة وقال: يا جماعة عندي سؤال بريء: فيه أحد فيكم يعرف ليش انولدنا؟

أنا عن نفسي حاسّ إني طلعت للحياة بس عشان أدفع، كل يوم فاتورة، وكل شهر قسط، وكل سنة زيادة أسعار، يعني أنا كابني آدم كل دوري اقبض واسدد"!

أبو الشباب ضحك وقال: "ترى احنا كلنا بالهواء سوا، نفس الشي يا ابو الرجال، بس الفرق ان بعضنا متفائل حبتين وحته، ويسميها حياة، مع إنها مجرّد جداول استقطاع شهرية للغير".

قال الرجل، وهو يناظر الطوفة جنه يشوف شاشة ارقام البنك: "والله ماهي حالة من أول مانولدت وأهلي ما غير يدفعون ثمن الولادة والمراجعات، وحليب وحفاضات، وجامت سيارة اتهمت بكسرها، ويوم كبرت شوي دخلوني حضانة، وعقبها مدرسة خاصة لان التعليم الحكومي مامن صمايل، وراح يضطرون يجيبون لي مدرسين خصوصين لكل المواد، وعقب ما خلصت دخلت الجامعة، وطلبات بعض دكاترتها اللي ما تخلص، اشتر كتابي غالي الثمن، وان شاء الله ازيدك كم درجة، واخرتها معطيني اف، مع العلم ان كتابه اغلبه قص ولزق واقتباسات هاملة مالها راعي.

ما اطولها عليكم، قول طول، توظفت واستلمت اول راتب طرت من الفرحه، لكن الفرحه مادامت الا شهر، لان راتب الشهر الثاني ما شفته لانه راح اقساط".

المعاق ابتسم وقال: "يا رجال حتى الحياة الزوجية صارت أقساط، تبي تتزوج تاخذ قرض للمهر، واول ما يخلص تجدد القرض للعرس، وهدية الملجة على البطاقة الائتمانية الفضية، وإن ما صار توافق بين الزوجين وعندهم عيال، ونويت تطلق، ومحاميك لك عليه، المحكمة تكسر ظهرك بالنفقة، وتوابعها من إيجار شقة، وتجديد اثاث وخدامة ودريول".

هز الرجل رأسه بكل أسى وقال: "حتى لما حلمت البارح حلم على قدي إني تشتريت سيارة، صحيت ولقيت رسالة من البنك تقول: عزيزي العميل حاول تحلم على قدك، لان أقساطك وصلت للمت الأعلى، طووط هذه رسالة مسجلة"!

الخبير: "أنا يا جماعة مش عاوز ابقى غني، وعندي عزب وأطيان، وحساب في البنك، ولا عاوز شقة دوبلكس، كل اللي عاوزه نفسي اقوم بيوم مقراش تم استقطاع مبلغ وقدره، أو حد يتصل يقول: نذكّرك بسداد مستحقاتك يا عزيزي النسيان".

الشايب وهو يضحك قال: "انا لله الحمد المعاش دال دربه، لانه متوزع وخالص، وخلوني اختم بهذا الدعاء: اللهم سهل علينا سداد الدين، وخلّصنا من قسط الحياة، قبل لا تجي سكرة الموت، ولا تجعل قبورنا مديونة بعد موتنا".

ضحك الجميع ثم ساد الصمت، يمكن لأننا تذكّرنا إن موعد نزول المعاش بعد يومين"!

رفع ايده المتمولس عشان يختم وقال: "رايح لغيري لجل شمعه، وانا جايب لك شمس، انهدم بيتك وبخي بخي يا هملالي"؟

وفي هذه الاثناء رفع على مسامعنا الشيخ زغلول اذان الظهر.

كاتب كويتي