خمسة... لو تخسرهم تربح

"على غير العادة دخل الشايب الديوانية مبطل ازرة دشداشته، وهو ينافخ من التعب، وقام يتشكى ويقول: يا جماعة في ناس خسارتهم، وطلعوهم من حياتك تجيب المطر وچنك، رابح بلعبة "بلوتو" حقت اليانصيب". ابتسم الخبير وهو يهز اليمنى، وقال: "بص يا حج اول هام لعبة الحظ اللي بتتكلم عليها اسمها اللوتو، مش بلوتو، صاحب بطوط بتاع الرسوم المتحركة يا راجل ياعجوز. وثاني هام خلينا نشوف مين هما الناس اللي خسارتهم مكسب"؟

رد الشايب، وهو يعد على أصابعه:

1- وزنك الزايد: إذا تخاويت معاه، وتلبي له طالباته، يبي يركب على صدرك مثل دَين بنك الائتمان، كل ما تبي تتحرك يذكرك إنه موجود".

2- ضرسك المسوس: يعلّمك معنى العذاب، لا يخلّيك تنام، ولا تأكل وتلاقي نفسك آخر الليل تون وتقول: يا ليتني شلعتك من زمان.

3- صديقك الجاحد: اللي ما يذكرك إلا إذا كان محتاج، ان احتجته ما تسمع غير نغمة "الهاتف المطلوب مغلق او خارج نطاق التغطية".

4- جارك الحاسد: يحسد الاعمى على كبر عيونه ما يفرح لك بعرس، ولا ان اشتريت سيارة، ويتضايق ان علّقت لمبة جديدة بباب بيتك چنك فاتح مول جديد.

5- قريبك الحاقد: هذا مصيبة المصايب دمك من دمه، ومع هذا يتمنى لك طيحة الحظ، ما غير يراقب حياتك چنه يتفرج على فيلم أكشن مستمتع بشوفتك تتبهدل". قام الرجل من اخر الديوانية وقال: "يعني بالعربي، اللي تخسرهم مو خسارة اعتبر فرقاهم دفعة بلاء عن عمرك".

التفت الشاب، وهو يمسح حلچه من حلو قهوة وقال: "ما طاح من النجوم أخف للسماء يعني باختصار نظفت حياتك من عجاج السنين".

ضحكوا كلهم، وختمها الشايب، وقال: "بعض الخساير تجر بأذيالها الربح ماهو الخيبة وسلامتكم".

المتمولس: "لم تكن شيئا عظيما، انا قدستك، وابشرك اليوم حذفت القاف".

وفي هذه الأثناء رفع على مسامعنا الشيخ زغلول أذان الظهر.

كاتب كويتي