الخميس 30 أبريل 2026
30°C
تم نسخ الرابط بنجاح
"ترند" أو جرعة غباء؟
"جلسنا في ديوانيتنا يوم الاثنين اللي طاف، ودلة القهوة المزعفرة فايحة ريحتها، والجو رايق مثل أول الشتوية. فجأة، صاح الرجل بعلو صوته كأنه في بث مباشر: يا جماعة، شفتوا الفيديو اللي سواه اليوتيوبر ابو علان وبنته؟ دخلها صندوق السرير، ومعاها حلويات وكوكاو من كل شكل ولون...وسكر عليها الصندوق جدام المتابعين وأهل بيته، والله قلبي طاح من الخوف، ولله الحمد لحّقته قبل يوصل الأرض"!
ضحكنا انا والغويش ضحكة ما هي خالية من الصدمة، ومن عقبها انتشرت العدوى في كل ارجاء الفريج، واللي يمشون بالطريق.
واحدة من الجارات تقول: ولدي حط أخوه الصغير داخل كرتون النعال– أعزكم الله– وهو يصور يقول: نبي نطلع ترند، والله العظيم يا جماعة الكرتون ما تحمّل ولا الولد بعد.
ثم رفع المعاق عصاه الله يجزاه خير، وقال وهو يهز راسه:
بنت جيرانا سوت مسابقة النوم بالكراتين، والقطاوة صارت تراقبها كأنها لجنة تحكيم!
والخبير من آخر المجلس يضحك ويقول: "مش ناقص الا يعملوا أولمبياد البلاستيك".
الشاب ضحك وقال: "أمي تقول عيال جارتنا قاموا يسوّون تحديات الحلوى، يخشون الكاكاو في كل زاوية من البيت حتى مظلة السيارة ما سلمت، بس المشكلة محد يدري متى ينتهي هذا التحدي"؟
قمنا نضحك ثم قال أبوالرجال: "تدرون إن الدرعة (المتين) على حط أخوه فوق الديرفة يصوره، وهو منسدح ويقول له: بهالطريقة تصير مشهور، والله من يومها وأنا أضرب خمسين على خمس، وين عقول الأهل، شهرة على حساب سلامة عيالكم"؟
وهنا دخل الشايب ومعاه هيبته المعتادة، وقال بحزمٍ خفيف لكنه موجّه مثل السهم: "يا عيالي الله يهديكم صايرين مخرجين يوتيوب، بس للأسف عيالكم صاروا ضحايا تجارب خطرة، استحوا على وجيهكم مو كل جعري يسوي هبّة تركضون وراه، هذي شهرة على حساب براءة عيالكم، راقبوا اللي يتابعونه، ولا تنطرون لين تطيح الفاس بالراس"!
سكتوا اهل الديوانية شوي والكل يطالع الأرض.
المتمولس كسر جام حاجز الصمت، وقال وهو يفشّ قهره:
"ما ودي أمدح، نفسي خايف من الرفسة يكفيني إذا دخلت أي مول الباب يفتح بروحه... هيبة قسم بالله".
ضحكنا من قلب لين رفع الشيخ زغلول على مسامعنا أذان الظهر فسكَت اهل المجلس الا من الترديد وراه.
كاتب كويتي
