مطبات مالها حدود

"في الديوانية اليوم الجو رايق، والتكييف على درجة 24، وغوري الضيوف الاصفر له صفير من كثر ما طبخ، وفي الخلفية الرجل يصيح: ثلاث مرات اف، ومرتين أفيه يا عمودي يا فقري!

عطاه الشايب خزه من المسموح فيها، والحقها بقول: عسى ما شر، يا أبوالرجال وراك تأفف؟

قال الرجل وهو يمدّ كراعينه ويسند ظهره للطوفة: يا حجي من كثر المطبات اللي مريت عليها، وانا جايكم وحده ترفعك، واختها تهبد فيك الارض، اللهم يا كافي، كل مطبتين بينهم مطبة تهدّ الحيل، وكل الشارع نصف كيلو، والله يا جماعة المطبات عندنا صارت أنواع وأشكال، أكثر من أنواع العطورات".

ضحك الشاب وقال: لعلمك يا أبو الرجال، المطبات بالكويت ما هي لتخفف السرعة وبس، بل لتكسير عظامك وسيارتك ومزاجك".

رد الرجل وهو يرعص على ركبته بكمادة ثلج: والله صدقت، وعلى ما اعتقد اللي صممها ماله علاقة بالهندسة، هذا فنان تخطيط اجل بعض الشوارع، طولها كيلو واحد فيها من ست إلى ثماني مطبات.

يعني انت وحظك إن سلمت من الأولى، الثانية بانتظارك، والثالثة فيها حفرة للذكرى تتصور معاها سيلفي".

الشايب قال متنهّداً بشرقه: "ترى المطبات لا بد منها يا عيالي، لان بعض الناس الله يهديهم سواقتهم طايرة داخل المناطق السكنية، وخصوصا الجيل الجديد من اهل توصيل الطلبات، ولكن يا الربع هذا مايمنع ان المطبات لها مواصفات ومقاييس خاصة.

واللي قاعد يصير عندنا شغل عشوائي، مشارك فيه المواطن لان بعض اهل البيوت يبون مطبات على مزاجهم، چنهم يزرعون نخل، هذا غير اللي حافر الغار عشان يمد واير كهرباء بمقاطع الشارع لحديقة او مظلة سيارة".

هزّ الخبير رأسه وقال: "بصو ياحضرات، المشكلة تكمن في التنفيذ، مثلا في الدول الثانية، القريبة والبعيدة، المطب الصناعي عندهم بمقايس، مثلا، يكون عريض المنكبين، ومصبوغ بلون فسفوري، وقبليه لوحة تحذيرية وبعد منه طريق مرحرح.

واللي انا بشوفه عندكم، لا لون لانه بيسيح ثاني يوم، وكمان مفيش لوحات تحذيرية بوجود مطب، وللأسف بعض المطبات عجل العربية بيخوش بفحرة تحسسك انك داخل مغارة جعيثن(جيعتا) اللبنانية".

ابتسم المعاق وقال: "على ما اعتقد أن ما فيها شي إذا استوردوا افكار للمطبات من الخارج، لعل وعسى ينصلح الحال"!

ضحك الجميع ووزع جبير استكانات الچاي، اللي له نص ساعة يحوسه، وهو على النار، فقال أبو الشباب ساخراً: والله يالربع لو تمرون ببعض المناطق تحلفون ما تدخلونها مرة ثانية!

كل بيت جدامة مطب، وكل مطب له شكل، واحد مربع، واحد مثلث، وواحد ارتفاعه يوصل حد السقف، هذا غير المطب الاسمنتي اللي حدره بايب ثلاث ارباع الانش".

ضحكوا حتى دمعت عيونهم، ثم ختم الشايب الكلام، وهو ماسك نعوله بيده، وعاض شليل ثوبه، استعدادا لتسليم نفسه لام العيال: "رسالة لمن يهمه الامر، المطب وسيلة تهدئة ما هو وسيلة تدمير لدبات الكزوز والهدرزات وملحقاتها.

ومتى ما صار الحل أخطر من المشكلة اعرف إن حنا على الطريق الغلط، حتى ولو كان الطريق كله مطبات!

نصيحة شايب لعياله، قبل لا تطلع بسيارتك لا تنسى ترديد دعاء "اللهم سلّم سلّم"، لأنك راح تمشي على سلسلة مطبات مزروعة بعشوائية غير متقنة، وسلامتكم من كل شر، والسامع يقول: امين.

المتمولس قال والدموع أربع... أربع من الضحك: "الحين الطيارة إذا حلقت تحلق بموس والا بمكينة"؟

وفي هذه الاثناء رفع الشيخ زغلول على مسامعنا اذان الظهر.

كاتب كويتي

‏[email protected]