الثلاثاء 18 نوفمبر 2025
23°C
تم نسخ الرابط بنجاح
التقاعد يا جماعة ما هو النهاية...هذي بداية النعناع
"الشايب، وهو يلقط جمرة، طاحت من راس شيشته قال: يا الربع بعض المثقفين –اللي أنا مو منهم طبعاً– يقولون إذا الواحد طلع تقاعد، المفروض ينسى هموم الدنيا ويخلّيها ورا ظهره، لان رحلة الحياة قصيرة (الله اعلم) وما تسوى الزعل، ولهذا استمتعوا بالباقي من العمر، بما يرضي رب العباد، عقب تعب السنين، وشقى الشغل، والركض وراء المواعيد، وتربية العيال، اللي كل واحد فيهم مشروع أزمة قلبية".
رفع الرجل رأسه وقال: "كلامهم حلو، بس وين نلقى مفتاح باب الراحة؟ اللي يطلع تقاعد منا أول أسبوع يضحك، ثاني أسبوع راكب الطيارة، وثالث اسبوع يحسب معاشه وكم يصفى له، ورابع اسبوع، اصبغ لنا الصالة، وجدد مطارحها وحمامها لا تنساه، دامك دافع دافع، وخامس اسبوع ما غير تناظر الغسالة، وهي تشتغل وتقول: والله التكنولوجيا تطورت، ومعها مفيش مستحيل".
ضحك أبو الشباب وقال: "أعرف واحد أول ما طلع تقاعد، قرر يعيش لنفسه وراح اشترى بيبي متوه هولندي، ما يعض يصلح للمتقاعد والجهال، عشان يهون عليه الوِحدة، بس بعد أسبوع الببغاء صار ينام قبله ويقوم عقبه، التقاعد يا جماعة ما هو النهاية ...هذي بداية النعناع".
الشايب حبس دخان الشيشة، ونفخه بوجه الخبير، وقال: "صاحب ابوالشباب لو مزود المبلغ ومتزوج أبرك له، ثم أسهب في كلامه: ابنائي الاعزاء التقاعد مو نهاية الرحلة، بالعكس بداية مرحلة جديدة، مرحلة إنك تصالح نفسك، وتتعلم تقول لا، بلا خوف، وتنام متى ما بغيت وحبيت".
ضحكوا كلهم وقال الخبير: "اللي مغطيه دخان الشيشة، اللهم اجعل تقاعدكم تقاعدا مبروك براحةً بعد تعب، لا قلةً في الجيب، ولا كثرةً في الهم، اللهم ارزقهم البركة برواتبهم، ولا تجعل الدنيا أكبر همهم".
المتمولس اللهم امين يا شيخ، وقال: "يالربع في سؤال راح يطلع براسي قرون، طريق النجاح هو تراب وإلا غار"؟
وفي هذي الاثناء رفع على مسامعنا الشيخ زغلول اذان الظهر.
كاتب كويتي
