حزب خلها وراء العيد

الشاب ماسك المايك بصدر الديوان، على يمينه الخبير، وكأنه يعلن اكتتاب عام، وقال: يسرّنا أيها الإخوة الكرام أن نعلن، وبكل فخر وكسل، عن التدشين الرسمي لأقوى كيان تنظيمي في تاريخ الديوانيات: حزب"خلّها ورا العيد" النسخة الصخرية لحزب متجدد سنويا لا يهتز...لا يتحرك... لا ينجز، لكنه ثابت كجلمود صخر حطه السيل من عل.

ويسرني ان اعطي المايك لخبير الحزب ليعلن عن فتح باب الانضمام الي الحزب.

الخبير اشكر اخي ابو الشباب رئيس الحزب الرائد في فن التأجيل، والسبّاق في صناعة الأعذارالرمضانية، وبهذي المناسبة نرفع لكم شعارنا "اليوم ضغط...وباجر أفضى". وتكون رؤيتنا: تأجيل كل ما يمكن تأجيله، حتى ينتهي الموضوع من نفسه.

ونعطي المايك للمعاق فليتفضل: سؤالي عن كيفية الانضمام للحزب، وما هي الشروط الواجب توافرها؟.

الخبير سحب المايك وقال: باب الانضمام مفتوح للكل دون تفرقة، وكل المطلوب صورة شخصية للمنتسب، بعين مفتوحة والثانية مسكرة.

الرجل حكّ لحيته وقال: وليش عين مفتوحة وعين مسكّرة؟

الخبير يشرح وكأنه بيقدم دراسة جدوى: العين المفتوحة عشان يشوف المشكلة، والعين المقفولة عشان ما يحلّهاش! ده توازن سياسي يابو الرجال.

المعاق ضحك وقال: يعني نشوف الحفرة قدامنا، ونغمّض عين ونقول: خلّها ورا العيد، وهل فيه امتيازات ولوائح بعد؟

الشاب تنحنح ورد بفخر: طبعاً، تأجيل القرارات، تأجيل الاعتذار، تأجيل الاعتراف بالخطأ، تأجيل الرجيم والعرس إلى إشعار آخر، حتى لو جاك واحد يقولك: ترى الموضوع مستعجل. ترد عليه بعضوية رسمية: مستعجل؟ خلّه وراء العيد...ونشوف.

ومن لوائح الحزب مادة مهمة: المادة الأولى: أي موضوع ينفجر قبل العيد، نقول: ما عطيناه فرصته، والمادة الثانية: إذا جا العيد نمدّد التأجيل إلى ما بعد الإجازة، المادة الثالثة:إذا انتهت الإجازة نقول: خلّنا نبدأ بداية صحيحة من الشهر الجديد!

الشايب هز راسه وقال: يا عيال أخاف يصير عندنا يوم نسميه "عيد التأجيل الوطني"، نحتفل فيه بكل القرارات اللي ما سويناها.

الخبير المصري صفق وقال: برافو عليك يا حاج، ده مشروع عيد قومي جديد، نحتفل فيه كل سنة مع بعضينا يا جماعة.

وسكتت الديوانية ثانيتين بس، وبعدين قال الشاب: اقتراح طيب من بابا عود، ويسرني ارفع على حضراتكم البيان الختامي: اللي نعلن فيه تأجيل الضمير إلى إشعار بعد العيد نشوفكم على خير وسلامتكم.

ابتسم الشايب وقال: لا يا ولد، واضح إن الحزب هذا بينحل قبل أول اجتماع.

المتمولس قال وهو يصب الشاي: "نصيحة إذا نومك متقطع خيطه".

وفي هذه الاثناء رفع على مسامعنا الشيخ زغلول اذان الظهر.

كاتب كويتي