صفارات الإنذار تدق... وكلٌّ يدور زاوية تصوير

دخلت الديوانية البارح، ولقيت الربع متجمعين حول أبوالشباب، چنهم باجتماع مائدة مستديرة. وكان شكله متحمّس يسولف سالفة كأنه شاهد عيان (الله يشافيه) طالع من فيلم أكشن.

قلت له: خير إن شاء الله شصاير؟

قال، وهو يحط ملعقة الجيلي بحلچه: اللي صار أمس بالجمعية يابوالرجال ما صار حتى بافلام بوليوودالهندية.

طارت عيوني وقلت: شلون يعني؟

قال: أول ما اشتغلت صفارة الإنذار، المفروض الناس تلتزم بالتعليمات، وتدخل الأماكن الآمنة، بس اللي صار شيء ثاني. عمال وكاشيريت السوق المركزي تركوا الميزان، وتركوا الطماط والشبنت، وتركوا الزباين اللي واقفين طابور جدام كرسي الكاشير، وكل واحد منهم طلع تليفونه وركضه للباب يصورون السماء. واحد واقف فوق الكراتين عشان زاوية أحلى، وثاني فاتح بث مباشر يقول: جنتلمان لايف... لايف... ون تو تري (وسل) صافرة إنذار كويت ناو.

والمسؤول بالجمعية يصارخ: يا جماعة خشو جوه ده انذار بلاش حركات العيال اللي انتو عاملينها.

لكن عمك، وخالك ونسيبك اصمخ، واضح إن الجماعة مشغولين بمهمة بطولية أخطر، وهي توثيق الحدث للتاريخ مع سلفي للاحفاد.

قلت للربع: يمكن يحسبون فيه جائزة؟

قال المعاق: جائزة شنو؟

قلت: جائزة أفضل تصوير للحدث! الفائز يحصل على ألف لايك، او ورده، او شعره من ذيل اسد.

وعقب ما ضحكوا الربع قال الخبير وهو يهز راسه: المشكلة مش في التصوير، المشكلة إن بعض البني ادمين بقا عندهم مرض اسمه هوس اللقطة.

قلت: شلون؟

رد الخبير: قلتلي ازاي، بص يا فندم الناس المهوسة، ما يهمهاش حد، لدرجة انهم لو شافوا نيزك السلحدار نازله من السماء مش هيقولوا: اجري ياله، دول هيقولوا سيبونا لحظه نصور ونذيع. النوعية دي من البشر لو شايف حادث مروري ما بيسألش: هو فيه حد مصاب؟

قلت: إي والله، تحس بعض الناس لو قامت القيامة تلقاه يقول: لحظة بس،خلوني أحطها ستوري!

قال الشايب: المشكلة إن الدولة تقول لا تصورون وقت صافرات الإنذار، عشان سلامتكم! لأن سلامة الناس ما هي لعبة، والبلد مو استوديو تصوير، والكويت بالاحداث الحالية يا جماعة ما هي مكان مناسب لعمل لقطة سناب او تكتوك...الكويت بيت يجمعنا على العز والمعزة، والبيت له نظام وقوانين وله احترام، ومن المفروض الكل يقول سمعا وطاعة لأغلى دار.

سكتت الديوانية لحظة، وإذا بالشيخ زغلول داخل علينا يتقهوا مثل عوايده بليالي رمضان، وسمع آخر الكلام وقال: يا جماعة... اللي بيصوّر وقت الخطر عشان لقطة زي اللي يولع بيت أبوه بكبريته، قال ايه عاوز يشوف لون الدخان، سكت شوي، وعدّل غترته وقال: بس الظاهر ان بعض الناس عندهم مبدأ جديد، وهو السلامة أولاً، لكن بعد ما نخلص من التصوير.

المتمولس: تروح تزور ناس وتسمع صوت الخلاط بالمطبخ، واخر شي يجبون لك شاي، طيب والخلاط ليش شغلتوه، وين الكيك وما لذ طاب؟

اللهم احفظ الكويت وشعبها وقيادتها، وادم عليها الامن والامان والرخاء وسائر بلاد المسلمين.

كاتب كويتي