اللي يبيعك وقت الضيق لا تقول تاجر... قول تاجر فيك

في الديوانية الجو مشحون من الأخبار، داخل المعاق يلوّح بتلفونه:"اسمعوا اخر خبر يقولك اللي يرفع الأسعار ويتلاعب فيها، راح يتعاقب، ويمكن يسكرون محله".الرجل قال وهو يضحك ضحكة مُرّة:"زين بلغوا بعض التجار يفضّون محلاتهم من الحين حتى لو بنص السعر".

الخبير اللي دايم ساكت هالمره تكلم: "يا جماعة في ناس إذا شافت أزمة ماشية على رجليها، ما تشوفهاش مصيبة دي بتشوفها موسم"!

قال الشاب: "موسم شنو"؟ 

رد الخبير: "موسم نهب وصاحبه غايب، بس بطريقة رسمية، وبرفقة فاتورة".

ضحكوا بس الضحكة كانت ثقيلة، ثم قال المعاق: "والله في ناس لو ينقطع الأوكسجين يحطون عليه عرض: تنفّس هالحين وادفع بعدين"!

قال الرجل: "لا... لا راح تسمع عرض خاص يقولون فيه: نفسين بسعر نفس".

الشايب ضرب الأرض بعصاه، وقال: "اسمعوا يا عيالي التاجر الحقيقي وقت الشدة يوقف مع الناس، مو يتكسب على ظهورهم".

الشاب قال: "بس بعضهم يقول: التجارة شطارة". رد الشايب بسرعة: "هذه مو شطارة، هذه قلة نخوة مغلفة بسعر جديد، يشفط ما بالجيب"، وسكت شوي وبعدين قال: "اللي يرفع السعر وقت الازمات، ترى ما يبيع سلعة، لانه ناوي يا كلك حبه حبه، زي البرشومي بعد ان عطى ضميره اجازة، وبالمناسبة بعضهم أذكى من السعر نفسه، يرفعون دون ما تحسون"!

قال الخبير: "ازاي يا عم الخبرة"؟

رد الشايب، وهو يبتسم ابتسامة خفيفة: "يقلل من الجودة ويرفع السعر، ويقول لك: نفس المنتج! لا يا حبيبي ما غير الاسم بس".

هنا سكتوا كلهم واضح إن الكلام وصل.

الرجل قام وعدّل غترته، وقال زبدة الكلام: "الفلوس تجي وتروح، بس السمعة إذا طاحت ما يرفعها لا عرض ولا خصم، وللأمانة مو كل تاجر حرامي، وبالختام اللهم لا تجعلنا ممن يضيق على الناس أرزاقهم، ولا ممن يبيعون ضمائرهم وقت الشدة وسلامتكم". قال المتمولس: "عيناها سبحان المعبود مسحت الكحل صارت محمود"!  وفي هذه الاثناء رفع على مسامعنا الشيخ زغلول اذان الظهر.

‏[email protected]

كاتب كويتي