هوم تيكا تيكا هوم والله ولعب الهوا

في ديوانية الحي يحييك، بعد ما شرب الجميع قهوتهم، وتقهووا على راحتهم، فجأة ارتفع صوت جوال الخبير، على أغنية سلطان الأغنية الشعبية أحمد عدوية: "هم تيك تك هم... والله ولعب الهوا".

الديوانية صمتت، والربع لفّوا على الخبير بدهشة، بينما الشايب يقلب استكانته، وابتسامة عريضة على وجهه: وش فيك يا خبيرنا؟ سنارة الحب غمزة معاك، ولا البطارية فل؟

الخبير يهز رأسه على الايقاع،عيونه نصف مغمضة: لا يا عم الحاج، دي حالة (ساعة تروح وساعه تيجي) فنية بين قوسين إحساس!

أبو الرجال يضحك وهو يقلب السكر: إحساس، أمس تقول الحب مضيعة وقت، واليوم صرت سلطان أهل الهوى؟

الخبير يغمض عينيه ويهز كتفه: يا ناس، القلب من صعب التحكم فيه، اليوم هنا، وبكرة هناك.

ارتفع صوت الأغنية أكثر: "الورد راح كده... والفل جه كده".

الشايب يضحك بصوت عالٍ: إي صحيح، حتى الورد راح من حسابك، والفل جاك فاتورة.

الربع انفجروا بالضحك. المعاق لوّح بتلفونه، يعرض ندب الادنين بالاقصين، ونقعد اللي تايهٍ مسراه: لا... لا... خلونا نفهم من الباشا إنت تحب مين بالضبط؟

الخبير يفتح عيونه على مصراعيها يتلعثم: والله، بقيت بين ده وده يا حاج.

سكتت الديوانية ثانيتين قبل لا يجي سلطان، ثم علّق الشاب من آخر المجلس، وهو يضحك بصوت خشخشي: يعني بالعربي، لا هذي راضية فيك ولا الثانية داريه عنك؟

حاول الخبير يحفظ ماء وجهه، بهز يده بشكل ميلودرامي: أنا مو محتار، أنا يا جماعة أعيش التجربة بكل حواسي، حسحوسه... حسحوسه.

الشايب يوجه له نظرة بنص عين مع ابتسامة ساخرة: يا رفيق الدرب، تجربتك فاشلة، ومدفوعة الثمن.

جمهور الثالثة يمين بالديوانية يضحك ويهز رأسه، بعضهم يصفقون على تعليق الشايب، والبعض يلوّح بيديه مع الإيماءات على طريقة العرضة: صحيح... صحيح.

لحظة سكون يسمعون مقطع من الأغنية:"حبيبي السكره... وغرامو غندره سلطان اهل الهوى".

الشاب من طرف الديوانية يرفع صوته ويضحك: سلطان بس بدون رعية. الديوانية كلها انفجرت ضحك، بعضهم يمسح دموعه والشايب يرتشف شايه بابتسامة: زبدة الكلام اللي قلبه كل يوم على لون لا هو سلطان، ولا حتى وكيل عريف، مو كل واحد قال "أحبك" صار عاشق، ولا كل واحد راكب بين القلوب بقاري صار سلطان، يا عيالي اللي يلعب على حبلين من غير مشبك ينقطع فيه.

المتمولس يربط رأسه بغترته، وهو يضحك بصوت مكتوم:

إذا صبرت على شطحات الخبير أربع مرات، بتصير صابر الرباعي.

الخبير يحاول يرد بابتسامة متوترة، بينما بعض الربع يهمسون: يا دنيا شوفي الجذاب بعده ما تاب، يجذب على هذي وذيج.

وفجأة ارتفع أذان الظهر من الشيخ زغلول.

كاتب كويتي