افتح مخك قبل لا تفتح الكاميرا

جو الديوانية اليوم مو طبيعي توتر، أخبار، وكل واحد حاط نفسه مخلل، قصدي محلل ستراتيجي، من الدرجة الأولى.

فجأة يدخل الشاب المعروف بين اهل الديوانية المراسل أبوسناب، وكاميرته شغّالة وصوته عالي: متابعيني الأعزاء... الآن ننقل لكم الحدث أولا بأول!

الربع لفّوا عليه، قال المعاق أبو فهد: يا ابن الحلال سكّر السناب مو وقت شو.

الشاب بكل ثقة: هو لازم الناس تعرف، أنا أوثق الحدث مو أكثر.

الخبير يناظره بنظرة كلها استهجان: انت بتقول ايه وبتوثّق ايه، انت كدا بتسوق نفسك على حساب بلدك؟

ضحك على استحياء بالديوانية، الضحك نرفز ابوالشباب اللي قال: أنا أنقل الحقيقة بكل صدق وامانة.

الرجل: الحقيقة غدت مثل الخيال، هو عدوي وانت اوفى خليل. ولا الموقع والوقت وخوف الناس، يا ابن الحلال انتبه تراك قاعد تعطي معلومات ببلاش لأي واحد يتفرج.

الشاب: لا تبالغ يا ابو الرجال كلها سنابات وراك متشائم؟

الرجل: اليوم فرحان بسنابك، وباچر يلف الدنيا كلها بالواتساب وبالتك توك واستغارام وثريدز لحم، يعني بضغطت زر تلقاه يمشي وراك بكل سكة، وجهاز لين يوصل لكل مكان. 

المعاق عطاه صاروخ ارض جو وقال: يا فرحة امي عندنا مراسل، بس شغله ضد اهله وناسه، الضحك وصل سماء الديوانية، والشاب ارتفعت احزانه، وبدأ يحس إنه محشور بإحدى زوايا الديوانية.

الشايب قرّب منه، وتله من عتراه (علباه) وقال بهدوء: بسألك سؤال بسيط: لو اللي قاعد تشوفه يضر أهلك تنشره ؟ الشاب انطرم چان يعطيه الشايب حد الدعسة، وهو يقول: يابوك الوطن مو محتاج كاميرا الوطن محتاج عقل.

أبو الرجال ضرب الميز (الطاولة ) وقال: افرض الفيديو وصل لجهات معادية، وكشف عن مواقع حساسة، وش راح يكون موقفك؟ اكيد راح يحاكمونك بتهمة التخابر مع عدو.

الشاب نزل تليفونه شوي، وقال بصوت واطي: يمكن... يمكن استعجلت!

الشايب ابتسم: مو يمكن... أكيد،  بس زين إنك لحقت على نفسك قبل لا يصير اسمك ترند... بسبب غلطة وجهل.

الديوانية سكتت لحظة، وبعدين قال الخبير: عندك خبر انت ودماغك المربع ان أخطر واحد مش اللي بيخوف الناس، انما اللي بينشر الخوف وسطيهم؟ لعلمك ولعلم امثالك من الجهال اللي يصوّر وينشر دون وعي مش إعلامي، ده ثغرة تمشي على رجليها، يا ابني في زمن السرعة مش البطولة بانك اول واحد ينشر، البطولة إنك تعرف متى تسكت خالص، لأن أحياناً ضغطة زر صغيرة تفتح باب ضرر كبير، ما بيتقفلش، وسلامتها ام حسن... وحفظ الله الكويت واهلها من كل سوء.

وبما ابوالشباب صار حفلة اليوم، دخل على الخط المتمولس موجها السهم الاخير، وقال: طول ما انت أصلع محد يقدر يمس شعره من راسك. 

وفي هذه الاثناء رفع على مسامعنا الشيخ زغلول اذان الظهر.

كاتب كويتي