كلها دقيقتين... والخلق مطوبرة

في الديوانية أمس الموضوع قلب تحقيق رسمي، بعدما تأخر أبوالرجال عن الجلسة ساعة كاملة، دخل معصب شماغه على چتفه، والعقال على الطاقية، ونفسه مقطوع قال: يا جماعة الخير أنا مو متأخر، أنا كنت رهينة بمحطة البنزين!

خيم السكون بالمكان بعد ان سكتوا الربع، ثم اضاف: كنت واقف أنتظر دوري وراء واحد اسمعه يقول: عبي فل... قلت: كلها ثلاث أربع دقايق ويجي دوري، فجأة الحبيب نزل من السيارة بكل هدوء، وسكر الباب وقفل السيارة، ودخل السوبر ماركت!

 (الخلفية بيب... بيب، اصوات هرنات سيارات منتظرين الدور).

المعاق بحسن نية: يمكن بيحاسب؟ 

قال الرجل: أي يحاسب؟ هذا دخل وكأنه ما هو جاي يعبي بنزين، الظاهر هذا مستأجر الموقف بعقد إيجارسنوي، أول ما دخل أخذ له قهوة، عقبها وقف يقارن بين نوعين شبس، وبعدين فتح الثلاجة وقعد يختار عصير، كأنه يختار شريكة حياته. 

(الخلفية بيب... بيب اصوات هرنات سيارات منتظرين الدور). 

الخبير وهو يضحك قال: الناس دي عندها قناعة بإن الطابور اللي بعد منهم مجرد ديكور. 

أبو الرجال كمل وهو يحك اذنه بمفتاحه: بعد شوي شفته واقف عند الكاشير، والله العالم انه يسولف معاه عن حرارة الجو، والزحمة، وجدولة رحلات المطار. 

(الخلفية بيب... بيب اصوات هرنات سيارات منتظرين الدور).

الخبير تدخل فجأة وقال: من باب اولى كنت تنصحه يا أبو الرجال، لان الكلمة الطيبة صدقة. 

الرجل وهو زعلان: يا خبير قلت له: بارك الله فيك الخلق وراك مطوبرة، والله العالم بظروفهم، قال لي بابتسامة هوليوود: وشصار كلها دقيقتين. 

هني انفجر القروب ضحك لأن "كلها دقيقتين" عند بعض البشر تعادل موسم كامل من مسلسل تركي، باجزاءه الاربعة. 

المعاق وهو يضحك قال: كلها دقيقتين هذي أخطر جملة بالكويت، الدقيقتين هذي يمكن تولد فيها أزمة، ويتضارب فيها ثلاثة محد يفرقهم، ويخلي واحد ينزل من سيارته يخدر له قوري شاي، يتشارك فيه مع اهل طابورالبيب... بيب. 

ابتسم الشايب وقال: من الذوق والادب، اللي يبي يتسوق يوقف بموقف السوبر ماركت، لان المحطة مكان تعبئة ما هي جناح كبار الزوار، والله عجيب امر بعض هالبشر يعبي سيارته بنزين ويفضّي صبر الناس مجاني. 

(الخلفية بيب... بيب اصوات هرنات سيارات منتظرين الدور) تحرك يا ح...؟ الله العالم يقولون يا حلو الملامح يا...!

تنحنح المتمولس وقال: "شي حلو ان الناس تشك فيك، وانت ما عندك ما عند جدتك.

وفي هذه الاثناء رفع على مسامعنا الشيخ زغلول اذان الظهر.

كاتب كويتي