الله لا يحدّني للي ما يودّني

في الديوانية الجو متكهرب، من سوالف الذهب الغالي، وغلاء الاسعار، والأسهم الهابطة.

دخل الشاب متضايق، وجهه چنه شاري سيارة شاصيها مدعوم، وجلس بقرب الشايب، وقال بنبرة أقرب للاستعباط: يا جدو اليوم الماما رفعت يدينها ودعت لي هذيج الدعوة، وللحين قاعد أفكر فيها، قالت لي: الله لا يحدّني للي ما يودّني. تهقى هذه مدحة لي ولا قاعدة تدعي علي؟

الشايب طالع فيه من فوق نظارته، وثم نزلها لأرنبة خشمه، وقال: مدحة؟ هذي مدحة موديل 2026. هذي مو مدحة يا فالح، هذي قذيفة كاتيوشا مغلفة بكرتونة هدايا.

ضحك الخبير وقال: من فضلك وضح له الصورة، يا عم الناس كلهم، الواد يعين امه عايش في لالا لاند.

ضرب الشايب الطاولة بخفة، وقال: عجايزنا ما يدعون عبث. هذي الدعوة ملغمة معناها: يا رب ارجع من السوق مشي بالقوايل، ولا يحدّني الزمن على واحد مفكر نفسه المنقذ يوكوهاما. وهو لو يشوفني أغرق، عطاني محاضرة عن فوائد شرب ماء البحر.

المعاق حك رأسه، وقال: والله يا عمّي چنك حاس اليوم انحدّيت على واحد من الربع في فزعة، وحسّسني إني جاي أطلب منه الرقم السري لخزنة البنك المركزي، مو سلفة بسيطة.

الخبير عدل جلسته، وقال بسخرية: يمكن أسلوبك غلط، يمكن خانك التوقيت، ورحت له، وهو يتابع ماتش كورة؟

رد الشايب بسرعة: لا تلف وتدور يا خبير الزمالك. اللي يودك لو تطلب منه چلوته يقولك: تبي اليمين ولا اليسار؟ واللي ما يودك لو تقوله سلام عليكم يرفع عليك قضية انتهاك خصوصية! ويخليك تحس إن طلبك هو السبب الرئيسي في ثقب الأوزون والتضخم العالمي.

ضجت الديوانية بالضحك، وقال الرجل من أقصى الديوانية: اسمعوا زبدة الحچي: اللي ما يودّك لو تجيب له الشمس في يمينك والقمر في يسارك يقولك: ليش ما جبت معاهم مكيف؟ واللي يودّك لو تجيه ببجامة مخططه ويدك فاضية، يقولك: يا هلا باللي يوزن بلد.

وبعدين غمز للشاب، وقال: وأمك صادقة يا ولدي، لا تنحد إلا على ربك، أما البشر خلك معاهم مثل كاميرة المرور، لقطة سريعة من بعيد لبعيد.

المتمولس قام يتمغط وقال: تجي تحط رأسك تنام تلقى مخك يغني دق دق سبعتين سبعه صفر مرتين، هذا رقم عبدالغني يعالجك من الوني!وفي هذي الاثناء رفع على مسامعنا الشيخ زغلول اذان الظهر.

كاتب كويتي