همومنا ستوري

دخل الرجل الديوانية بوجهٍ مهموم، وعيونه تتلاقط في محجريهما! سلّم وتنهد تنهيدة كادت تطير العود من المبخر، وقال: يا جماعة، الديون تراكمت، والسيارة خربت، والولد رسب، ومسؤولي بالدوام انا وابو الشباب قاعد لنا على الوحدة ونص، بالعربي مشاكلي واصلة عنان السماء.

خيّم الصمت على الديوانية، وتبادل الربع نظرات التعاطف، إلا المتمولس، فكان حاضن مركاه ويقلب تلفونه، رفع راسه فجأة وقال بثقة:

يا بو الرجال، إذا كثرت مشاكلك، نزّلها ستوري! أربع وعشرين ساعة وتختفي.

التفت الشايب إليه مستنكراً: يا ولد، الرجال يفضفض عن همومه، وحضرتك تقول له ستوري، هو التواصل الاجتماعي صار عيادة نفسية؟

رد المتمولس بكل برود: يا جدو، إحنا في عصر التحول الرقمي للمصائب، ليش نشيل الهم بقلوبنا دام نقدر نحطه على الشاشة؟

ثم التفت إلى الرجل وقال: صوّر فواتيرك وسيارتك الخربانة، وحط موسيقى حزينة، واكتب "الحمد لله على كل حال" مع قلب مكسور! بتنهال عليك القلوب، ويمكن واحد يكتب لك: "شد حيلك يا بطل"! ثاني يوم يختفي الستوري، وتبدأ يومك بفيس جديد، أما الديون والسيارة فهذي لها رب يحلّها.

ضحك الخبير وقال: يا سلام يا حاج، يعني الهم يختفي من الشاشة، حتى لو فضل قاعد على قلب صاحبه؟

قال المتمولس: بالضبط يا خبيرنا، المهم نحافظ على المظهر العام للمأساة!

التفت إلى أبو الشباب، وأضاف: وأنت يا بو الشباب، بدل ما يرتفع ضغطك من مسؤولك بالدوام، صوّر مكتبه من بعيد، واكتب "بعض البشر يحتاجون إعادة ضبط مصنع"، وحط هاشتاغ: بيئة عمل سامة. عقب أربع وعشرين ساعة يختفي الستوري، وتبقى الوظيفة على حالها، والمدير على راس عمله.

هز الشايب رأسه وقال: يعني نفضفض للتلفون، ونرجع نتحمل مصايبنا بروحنا؟

رد المتمولس: إي يا جدو، بس لا تنسى الفلتر المناسب، عشان الحزن يطلع بجودة عالية.

قهقه الخبير، وقال: والله فكرة يا حاج. دام حضرتك كل يوم تشتكي من القولون، ايه رايك نصوّر لك كوباية شاي أخضر، ونكتب "ملاذ الحاج الأخير"؟

ضحك الشايب حتى كاد يشرق بقهوته، ثم مسح فمه وقال: يا خوفي يا ولدي، ينتهي الستوري وتنتهي معاه هيبتنا.

عدل المتمولس جلسته وقال، كأنه اكتشف سر الكون: يا جماعة، المصيبة في هالزمن مو بس إنها تصير؛ المصيبة إذا ما حصلت مشاهدات! الواحد يزعل إذا محد شاف زعله، وينقهر إذا محد حط له قلب مكسور، كأن المصيبة من غير جمهور ما تصير.

أضاف: وعندي اقتراح أخير: كل واحد يصوّر مشاكله قبل لا ينام، وينزلها ستوري على أغنية "شيك شاك شوك"، يقوم الصبح يلقى الصور اختفت، ويكمل يومه بنفس الديون والهموم.

ابتسم الشايب ابتسامة حزينة وقال: يا ولدي، أول كنا نفضفض للربع، ونلقى من يسمعنا ويوقف معانا، الحين صرنا نبي الناس تشوف حزننا حتى لو محد حسّ فينا.

ساد الصمت، ثم ارتفع أذان الظهر بصوت الشيخ زغلول. قاموا الربع استعداداً للخروج، وإذا بكل واحد يفتح كاميرا تلفونه ويتأكد من جودتها.

شافهم الشايب وهز رأسه قائلاً: الله يستر علينا...لا تصير همومنا ستوري تنتهي بعد أربع وعشرين ساعة، وعقولنا تبقى عايشة فيها طول العمر.

كاتب كويتي