من ودّ وجيب... إلى افتح يا بوّاب

في صباح أحد الأيام، خيّم على الديوانية صمت يشبه صمت ما بعد صدمة فاتورة بنزين لاندكروزر خزانين. ما كان فيه سوالف لان العيون مشبهره بالشاب عريس الديوانية الجديد، اللي دخل يسحب كراعينة وعيونه وارمه، ودشداشته چنه مطلعها من حلق عنز، وعقب ما جلس تنهد وقال: الزواج اكبر مقلب اخذته بحياتي، وحابب اذيع. رفع الشايب حاجبه وشفط نفس من بخاخ الربو، وقال: خير يا ولدي، توّك معرّس، والمفروض تعيش شهر العسل، شنو اللي خلاك تعلن حالة الطوارئ؟

انتفض الشاب من مركاه، وقال: عماه أول كنت ملك زماني. أركب سيارتي وأطير من مجمع لمجمع. أشرب قهوتي على راحتي، وأسمع اللي أبيه، وأوقف وين ما أبي. الحين صرت سواق خصوصي، ومندوب مشتريات، وموظف توصيل. صرت مثل أوبر بس الفرق إن أوبر ياخذ فلوس وأنا (أنق) أدفع. ضحك الرجل وقال: يا حسافة يا ولدي، أول كنت كابتن الرحلة تتحكم بالسكان والتكييف والمشاوير. وإذا طفشت صدرت امر لهم: خلصوا بسرعة مواعد الربع. الحين ما عندك ارتباطات إلا مع الجمعيات والمجمعات ومحلات العطور.

ضحك المعاق وقال: كلها كوم ومعرفة المناديب كوم ثاني، لانهم يدلون بيته اكثر من بعض قرايبه. يدق عليه المندوب ويقول: صديق أنا عند باب بني تحت شجرة يلو كلر، وعلى طول يطير له چنه مستقبل وفد ديبلوماسي. ثم قلّد صوت زوجة نظر عيني يا فلان اهووه قوم المندوب وصل. افتح الباب بسرعة قبل لايمشي. ويقوم المسيچين من أحلى جلسة علشان يستلم كرتون صغيرون علبة الچبريت اكبر منه فيه رموش صناعية، أو مرطب شفايف بنكهة الفراولة، والله الزواج فله كرتون بدينارين سوّى فيك اللي ما سوته ديون البنك.

عدّل الخبير جلسته وقال: بصوا يا جماعة، دي مش جوازة، وبس دي إعادة هيكلة وظيفية. الواد ياعين امه كان وزير النقل والمواصلات، بقى موظف استقبال، واستلام طرود مع مرتبة الشرف. زمان كان يروح السوق يتمشى ويتعشى مع أصحابه، وهو راجع يشتري مسباح أو عطر، ودلوقتي بقى وشه مألوف لشركات الشحن أكتر من أهله، لدرجة إن غاب مندوب التوصيل يومين، الواد يسأل عليه ويقول:يا ترى الراجل تعبان؟

نزل الشاب رأسه، وقال بحسرة: يعني أنا تجردت من اشارة الكبتن؟

رد الرجل: يا ولدي أنت ما تجردت من القيادة، أنت انتقلت من سياقة السيارة إلى بواب عش الزوجية. ضحك الجميع، چان يقول المعاق: انا اقترح نصرف له سديري فسفوري وصفارة، وكرسي بلاستيك، وعصا تنور، عشان يمارس وظيفته الجديدة باحتراف. عدّل الشايب غترته، وقال: خل صدرك وسيع يا وليدي حنا السابقون وانتم اللاحقون، وازف لك البشرى، ان هالوضع كم سنه وتنتهي من سالفة ودّ وجيب. وتصير متخصص في فتح الباب للمناديب بس من غيربنزين. انفجرت الديوانية بالضحك، وعندها قال المتمولس: انا افضل مما تظن، وأسوأ مما تتخيل، فلا تظن ولاتتخيل. وفي تلك اللحظة ارتفع صوت الشيخ زغلول فقام الشاب أول واحد متجهاً إلى الباب. صرخ الخبير فيه، وقال: استنى يا ابني. ده مش مندوب ده أذان الظهر.

كاتب كويتي