"ألو يابو تسعة صفر"!

"انا اليوم طالبكم المقالة لي انا بروحي ما بي أحد يشاركني فيها"!
الرجل: "أبشر بسعدك، كلنا اذان صاغية لك يابو الشباب، بس عن شنهو راح تتكلم؟".
الشاب: "عن مشاركة منتخبنا الأولمبي بأول مباراة له بمشوار الآسياد، بعد ان افرحنا قبل كم يوم بالتأهل لكأس اسيا بأقدام عرباوية مثل قالوا، واللي على أثرها حصلوا على مكافأة تقدر أربعة آلاف دينار (يستاهلون الأبطال) لكل لاعب، مع الوعد بأنها يمكن تزيد من محبي الأزرق، والجهات الحكومية اثاريها فزت كديش ما هو أكثر! وين راح كلام رئيس الاتحاد ابوتحية عسكرية (ريلاكس ريلاكس) اللي قال ان الأمور سارت وفق المخطط (بأسود) لها، وان الفوز فتح لسمسم صفحة جديدة بين الاتحاد والجميع؟
وخطب رنانة وشربكة تصفيق، وين راح كلامهم أنهم رايحين للصين للظهور بصورة مميزة، استعدادا لنهائيات الدوحة، وهي الأهم، واخرتها المشاركة طلعت وهم في وهم؟
ما خلصنا، وانا من خلال هذي المقالة أطالب بإقالة كل اعضاء الاتحاد (بعضهم ما لهم بالرياضة)، اللي لطخوا سمعة الكرة الكويتية بهزيمة مذلة (منت قد التحدي خل لعبك مع بنغلادش ونيبال وتيمون وبومبا).
وربي شي يقهر مستوى فريقنا ابو تسعه صفر من الرأفة، لا وموقفين له الدوري بعد؟
حرام عليكم نبي نفرح مثل العالم بفريقنا، حتى لو بكاس دورة رمضانية؟
شي محزن كل الدول تقدمت بالكرة، وحنا نرجع وراء (طوط طوط المنتخب دش بالطوفة)، لا ملاعب، ولا محترفين، ولا احتراف مثل اقل الدول، ولا نقل تلفزيوني (منصة)، ولا تعليق، وتحليل مثل الاوادم!
السالفة صارت عندك واسطة تفضل هربد ببدلة، واقبض المعلوم، وانت رايح بيتكم، ولا تنسانا من الدعاء!
وقبل لا اختم ابي اعرف شنهو ردة فعل المطبلاتية، وبعض الفاسدين من الاعلاميين للاتحاد، بالـ"واتساب" و"اكس"، أكيد خيرها بغيرها، وشد حيلك يا بطل لا يحبطونك، انت بأول طريق النجاح، ابو ألف مليم، ولا تلتفت لكلام عوير وزوير ياريس، ومعها شربكة تصفيق طربية".
المعاق: "خسارة مباراة ما هي نهاية الدنيا، ولعلمكم الفريق ناقص لاعبين العربي والكويت والسالمية (الأندية اهم) اللي راح يلتحقون فيهم، وخلك متفائل يابو الشباب بالمباريات الجاية، انت ناسي ان الخيل الأصيل تلحق تالي"!
المتمولس: "لعدم صوتك ولا خلا منك مكان يا اسطه"!
وفي هذه الاثناء رفع على مسامعنا الشيخ زغلول اذان الظهر.

كاتب كويتي

محمد خلف الشمري

‏[email protected]