إيران وأميركا تلعبان بالنار...!

محمد خلف الشمري

الخبير يقلب صفحات الجريدة ثم قال: "الحق يا معلم باين ان الحكاية، ليها سوابق، هتكون جد الجد، لا يا عّم انا هخلع من البلد، وقبل ما اخلع هقدم على اجازة عارضة وقائم، وأروح لامي اصلها وحشاني اوي اوي"! المعاق:" انت وش تخربط مرة تبي تروح لامك، ومره تقول الحكاية لها سوابق. انت اليوم ما انت على بعضك العلم ياخبيرنا نورنا ينوبك ثواب، ترى انت منا وفينا"؟
الخبير:" بيقولك ماما،عوده، أميركا جهزت الخرزانه بعد ما كملت استعداداتها بالخليج، لتوجيه ضربة (الطبول هتشتغل) عسكرية قاسية لإيران (ربنا يعديها على خير المره دي) المارقة، وذكرت الأخبار انه لم يعد ينقص الهجوم إلا الطلقة الأولى التي تعلن بدء المواجهة العسكرية...انا عاوز اروح لامي".
الشاب:" على ما أظن ان السالفة كمال اجسام، ما غير فرد عضلات وبس، وكلها كم يوم وترجع الأمور على مثل ما كانت، وأحسن وفوقهم الف بوسه وبوسه، بس هذا عقب دفع الكاش موني الجماعي من دول المنطقة لا فرق الله شملهم"! الشايب:" نارهم تأكل حطبهم عود عود وحنا وش دخلنا بالموضوع"؟ الخبير:" بقولك الحرب على الأبواب، انا عاوز اروح لامي، وانت بتقول نار وحطب وعود يا اكل بعضه، انا باقترح عليك ياحج مراجعة دكتور سنان فورا، لان الصدمة اثرت على عصبك السنبثاوي، والنعمة مش عارف بأقول ايه، وده من عوامل التعرية السنيه المتراكمة على مر العصور". الشايب: انا أسجل اعتراضي وشجبي على ما تلفظت فيه لجانبي ياخبير، وأقول راح ادرس موضوع الدختور بكل أريحية، وهذي لحيتي جان شفت فرت أمك"! الرجل:" وش اخر اخبار اجهزة الدولة، وينكم؟ ما دري الجماعة هم ناسين او يتناسون، من صجكم ان حنا بقلب العاصفة، وخلوني اسأل كم سؤال بريء هل عندنا خطة طوارئ بالبلد، وهل عندنا خطط بديلة، الله يمسيك بالخير يا زجالو، تفوزنا في حالة إغلاق مضيق هرمز، وهل عندكم خطة لمواجهة اي تسرب إشعاعي من المفاعل الإيراني اللي قريب منا، وهل حاولتوا تجربة تشغيل صفارات الانذار، ومتى نشوف برامج توعوية للمواطنين تنورهم وتحذرهم من الاخطار المُحتملة؟ وآخر سؤال: هل هذا الموضوع له أهمية لنا، اذا كان الجواب نعم، لماذا لحد هذا اليوم، لم نسمع عن استعدادات لما قبل الأحداث، بإصدار أوامر حجز للقطاعات العسكرية من جيش وشرطة وحرس وطني والا الجراد اهم"؟ المعاق:" ومن سمعك يا عز الرجال، الأمور راح تمشي ببركة دعاء الولدين والمتصدقين. يابن الحلال أي خطة وأي طوارئ كهرباء وماء، الله يهداك، ناس ما عرفوا اشلون يحلون مشاكل الفساد والتزوير والاختلاسات وخراب الشوارع والبنى التحتية من الأمطار، تبيهم يحطون خطط بديلة للتسرب الإشعاعي، الحفاظه خوش حل، واللي يبط الجبد مجلس الأمة، شغال استجوابات خاسرة، اشوفه حاط الوضع الصامت للموضوع جنهم مايمثلون الأمة، وبالختام الله الحافظ يالربع، ومن مكاني هذا أطالب برفض اجازة الخبير مع الشغل والنفاذ"! الشايب:" الله يكفينا شر الحرب وطاريها، والله يهدي بعض شباب التواصل الاجتماعي، اللي ماخذين الموضوع هزل وضحك، واوجه لهم رسالة وأقول: ياعيالي الحرب ماهي مجرد حكايات وسوالف، بل هي تدمير للدول وتشريد للاسر، وأختم ترى والله حنا في نعمة لا يعلم بها إلا العزيز القوي، اللهم انا نستودعك بلادنا وأهلها، أمنها وأمانها، ليلها ونهارها، أرضها وسماءها فاحفظها من الطغاة ومن كل معتد وكل من يريد بها شرا". المتمولس:"‏اتمنى مرة انصح شخص ويتأثر، بس كلهم يقولون شف من يتكلم"... وفي هذه الاثناء رفع على مسامعنا الشيخ زغلول اذان الظهر.
كاتب كويتي