اشترِ كتابي تنجح!

"ازيكو عاملين (حواجبنا) ايه منك له… له ليك، ما تيالله بينا نعمل فلاش باك سريع لآخر مقالة نزلت لينا، وبالتحديد آخر ثلاث كلمات، قالهم ابو الرجال ساعة لما قال: عميد التسجيل بالإنابة برا بغا برا لجمع غفير من الطلبة اللي من وجهة السيادة أزعجوه!
وبهذي المناسبة غير المناسبة يشرفني ان أزف المايك على صوت مزمار بلدي لعمي الحاج هيييه اه هو دووم تك تاااك"!
الشايب: "حبيب قلبي يا خبيرنا، ويسرني ان انقل لكم حديث فلذة جبدي عن شكواها من القاعات المقفولة بالضبة والمفتاح، ما تدري لماذا؟
لان للاسف الكلاسات المفتوحة ما فيها كراس، واللي فيه اقل من العدد المطلوب، لان العدد المسجل اكثر من خمسين طالبة القرب من التعليم! وايضا هناك شكاوى من طلبات بعض الدكاترة (متعين بواسطة) اللي يحدونهم حد على شراء كتبهم بأسعار ما هي طبيعية لخثاريج (اي كلام) مجمعها الدكتور بكتاب رديء الطباعة والتغليف، وعندهم خبر ان النسخ واللزق شغال عدل، وهذا غيض من فيض"!
الشاب: "كلام عمي الشيخ اصاب كبد الحقيقة بفيروس، وبهالمناسبة اطلب من الحضور الوقوف دقيقة حداد على أمير الشعراء احمد بيه شوقي اللي قال:
"قم للمعلم وفه التبجيلا
كاد المعلم يكون رسولا"!
ما درى ان بعض دكاترة هاليومين صاروا مثل تجار الأزمات (معاشه ثلاثة آلاف وانت طالع) مستغلين جيوب الطلبة مدخول ثاني! ما هم حاطين بالحسبان انهم طلبة يأخذون مكافأة، يا دوب تكفيهم وتسترهم من طلب الفلوس من اهاليهم!
وزد اكس على ذلك، وتسلطهم رفعة خشومهم على الطلبة، واللي يزيدك غبن غلاسة البعض منهم يحارب الفساد بتغريداته بمواقع التواصل الاجتماعي"!
المعاق: "وازيدكم من الشعر بيت مخالف، دور رابع مبني، انا لي تجارب قاسية مع بعضهم، تحس فيهم امراض الدنيا، وجاي كرك يعوض نقصه فينا! اشفيها إذا صار سمح، وتركنا نستعير الكتاب من بعض، بدلا ابتزازنا بشراء كتاب بمبلغ وقدره، ومن ثم يشق صفحة كإثبات حالة شراء؟".
هذا غير سيمفونية انا درست باميركا، ودول البحر الكاريبي اللي وراء نواكشوط،وتغربت لين صرت دكتور!
يا عمامي التعليم مهنة جليلة، ورسالة سامية، واللي ما عنده مقومات هذه المهنة فليغادر غير مأسوف عليه! لان حنا يا معشر الطلبة جايين نتعلم مو جايين ننهان من واحد مضيع حلقه (فمه)، حتى المعلومة ما يعرف يوصلها صح!
ومنا الي من يهمه الامر جانه فاضي لمشاكلنا، واللي يرحم باباك ارحمنا من دكاترة البعض اشتر كتابي تنجح"!
الخبير: "حنا بالأخير نتكلم عن البعض، وليس الكل، ودي حالات انفرادات فردية! وبعرف ناس كثير ما أشتكوش بيوم من اي دكتور، لانهم منضبطين ومحترمين أنفسهم! وده ما يمنعش ان بعض الطلبة فاشلين وعاوزين كل شي بالساهل، واللف والدوران وسلامتكم".
المتمولس: "الدقيقة عندي هي مدة غير معلومة، يمكن تأخذ ساعة او ساعتين، والأغلب اسحب السيفون!".
وفي هذه الأثناء رفع على مسامعنا الشيخ زغلول أذان الظهر.

كاتب كويتي

محمد خلف الشمري

[email protected]