افضحوهم وشوفوا !

محمد خلف الشمري

اهلًا وسهلا،خير يارب اشوف، حصوه بعين اللي مايتسماش، الجماعة جايين مع بعض! قالها الخبير ثم أضاف:لا وكمان الشناوي متأخرين عن موعد ديوانية اليوم وكل يوم.
المعاق: والله انت فاضي تنكت يا خبيرنا، حنا جايين من المقبرة ونسأل الله الرحمة للميت الشاب والله يجبر مصيبة أهله.
الخبير: عظم اجركم بميتكم ويارب تكون دي اخر الاحزان، وياترى ايه سبب الوفاة ؟ يارب مش حادث عربية.
الشاب: الا حادث سيارة وهو جاي من مخيمات البر بالمطلاع، وللأسف الحادث ماهو الأول ولا راح يكون الأخير دام شوارعنا مكسرة ومهملة بهالطريقة. معقولة وصل عدم المبالاة الى هذي الدرجة من قبل وزارة الأشغال ؟ معقولة ماهي هامتهم ارواح المواطنين ؟.
الشايب: للأسف راح نخلص الشهر الثاني وندخل بالشهر الثالث، وتوب توب يابحر، من ساعة نزول المطرة القوية والوضع على ماهو عليه. استقال الوزير ووكيل وزارة اقيل ولحقه مدير هيئة الطرق بالإقالة والشوارع لليوم حفر، وكل يوم والثاني نسمع عن حادث فيه وفيات دون ان تتحرك الوزارة ومسؤولوها لاصلاح الخلل.
الرجل: ومن سمعك ياحجي، واللي يزيدك قهر يسوون عندنا مؤتمرات عالمية لمحاربة الفساد والفساد عندنا بعينه وعلمته.والله فشله،دولة غنية مثل الكويت طرقها وشوارعها بهذا الشكل المخجل. قال شنهو، يبون يكحلونها ويحمرونها بالروج قاموا بكشط الشوارع حتى يبينون لنا انهم مهتمين بالموضوع وهم لا مهتمين ولا ابو ذلك. والله يعينا على تصليح سياراتنا من جامات واصباغ وتواير ومعاونيات وهيئة امامية.
الخبير: اسمعوا الخبر الطازه، بيقولك حصلت شوارع الكويت على المرتبة الأخيرة خليجيا و63 عالميا في جودة الطرق، الف مبروك هانت المية قريبة، ربنا يكون بعونكم،شوارع مكسرة وحصى متطاير فيما يبدو ان المسؤولين ونواب الامة لا يشعرون بمعناتكم لأنهم يملكون سيارات من الدولة مكفولة من الدعامية للدعامية !.
الشاب: ليتهم يوقفون هالميزات عشان يحسون فينا، واتمنى من الله انهم يستبعدون الشركات الفاسدة بالضرب بيد من حديد مع التشهير فيهم بالإعلام، لمصلحة الوطن والمواطن، حتى لو كانوا من علّية القوم الخالدين، كافينا مجاملات ومحاباة للناس المتجاوزة لأن الكويت تستحق الأفضل.
المتمولس: اذا طاح الزوج من الدرج،الأجنبية: يا إلهي عزيزي هل انت بخير؟ في دولة نسيت اسمها تقوله وهي ميتة ضحك عليه:ربك مايضيع حق احد! وفي هذه الاثناء رفع على مسامعنا الشيخ زغلول أذان الظهر.

كاتب كويتي