بلد بتاعت باركود صحيح !

محمد خلف الشمري

"ما شاء الله اليوم على غير العادة قاعد" منفرش" بينا على الارض، تارك كرسيك فاضي؟قالها الشايب ثم صاح على سندرا(بصوت الضبع)" هات الشيشه قبل القدوع لعمك ابو الرجال".
الرجل:" جعل الوالي يأخذ الشيشه وطاريها، انا وين وهي وين، انا منهك القوى محمر الوجنتين، والمنخر مثل ماتشوف ياحجي، ما فيني لا شده ولا ضمه لها"!
المعاق:" عسى ماشر لا... لا... لا تقول انك جاي من مراجعة ، من خلى عادته انقطعت سعادته"!
الرجل:" جايك اطبخ وراديتري مفور من مكتب شؤون المستهلكين بوزارة الكهرباء اللي بالمنطقة، أخذت لي حوالي ساعة وانا افرفر بين البابين الشمالي والجنوبي، ابي ادخل وللاسف كلها مسكرة، طقيت الباب طلعلي جناب الحارس قلت: ابي ادفع البلاء، قصدي الفاتورة، قال: مش فاتحين ادخل على الموقع الالكتروني وادفع بالتي هي احسن.
رجعت خطوتين للوراء، وانسحبت نسسي اجر اذيال الخيبة، وانا ابرطم بكلام ممنوع من النشر، ما وعيت الا هذا واحد اعرفه يشتغل معهم بعد ما نخيته قضبت طرف غترته ودخلني معاه، وبعد ان أخذ مكانه خلف مقود الكمبيوتر ادخل بياناتي ومن ثم طارت عيونه من وراء النظارة على الشاشة، وقال: انت دخلت على الموقع الالكتروني؟
قلت: نعم وحطيت الأرقام المطلوبة مثل ما كتاب الموقع يقول!
قال: يا ولد انت ماحط نفسك بـ 18 الف دينار بس كهرباء!
لفت الدنيا فيني، وانا على الكرسي ثلاث لفات إلا نص، وقلت: ادخل على الله دخله!
قال: لا تخاف معاك البيانات؟
قلت: نعم.
قال: دقايق، واصلح الخطأ اللي انت مهببنه مرحبا الساع!
وبعد ربع ساعة قال: خلصت لك الموضوع هالحين تقدر تدفع من الموقع الالكتروني! قلت: انا طالبك اعتبرني تكروني، وخلني ادفع عندك!
قال: أبشر على هالافنس!
دفعت، وانا اقول له: اشلون يا اخوي تحدونا على الموقع الالكتروني، وهو صعب ينفهم؟ قال: غيرك واجد، منت الاول ولا راح تكون الأخير المشكلة، ومافيها أنكم تحطون الأرقام من غير الصفرين، وهذا اللي يضيعكم، ويجيب لكم الخرعه ام شهاق وسلامتكم".
الشاب: نسيحة(يعني واحد ذرب) اوجهها لكل وزارة بالكويت اللي يبي شغله يمشي إلكتروني عليهم اولا شرح الخطوات ببرشورات، او بالمواقع الإعلانية، حتى الناس تتجنب الوقوع ببعض الأخطاء، مثل ابو الرجال اللي تلاحق نفسه بمعرفة صديق له وعدل له الخطأ، والله يستر على اللي ادخل بيانات غلط (ماعنده صديق يكلمه) من مطمة ناطرته برأس الشارع بعد حين على يد مندوب اعلان".
الخبير:" للاسف الوضع الالكتروني بالكويت أشبهه بسلق البيض، نص استواء وخصوصا بأيامنا دي، كل مكان عاوز تروح له لابد من ان يكون معاك باركود مسبق على ايه مش عارف، وانا من خلال ديوانية أبوي الحاج أطالب الحكومة باقرار سياسة مناعة القطيع، حفاظا على كرامة المواطنين، ان كان ليهم كرامة مرسال من بهدلة الباركود وأيامه السوده، فعلا بلد بتاعت باركود صحيح، وابقى خلي بالك من العيال يا باتعه"!
المتمولس:" الطالب ينام طول السنة يشد حيله بالاخر يسقط، والنائب ينام طول الأربع سنين يشد حيله بالاخر ينجح وعجبي"! وفي هذه الاثناء رفع على مسامعنا الشيخ زغلول اذان الظهر.

كاتب كويتي
@aloooyaomm
‏[email protected]