بيض الله وجهك يا سيستم التأمينات

محمد خلف

"كأنه يوم أمس قلنا مرحبا بعام 2023، واليوم نودعها ونخش بعام 2024، تتغير الأرقام وتمر بِنَا السنوات، وكل ده من عمرنا وحنا للأسف محلك سر!
وزي كل سنه ندخل بأهداف جديدة، وبخطط ما تخرش الميه، واختيارات على اعلى مستوى على امل حياة جديدة مع كورس معسل، قصدي بناس عسل، وبالأخير بتطلع بصل زي عمي الحج وصحبه الكرام، ايييه ما دايم الا وشه".
الشايب: "اقول على شحم والبصل اللي ما هو عاجبك اكسر عليه بيض، ان لقيته صار الذهب أرخص منه! اقول موت حرة كلها أسبوع، ونستلم زيادة المعاش بأثر رجعي، وانت يا خبيرنا خلك بتوديع واستقبال السنين، هذي راحت وتلك جت"!
الرجل: "اسمع يا عمي الشيخ هالخبر الخاص والعصري، يقولك زيادات الحد الأدنى للمتقاعدين بأثر رجعي عن شهر 12 و1 مع معاشات شهر فبراير القادم"!
الشايب: "من أولها صار فيها تأخير، عسى المانع خيرو ابو الهنا يارب، ما يكون ابو عرام (باص) اصفر؟ بالصاح الحلو، ما يكمل بس وش السبب"؟
المعاق: "السبب يقولون العلة من برمجة السيستم"!
الشاب: "وين راح كلامهم الأمور بالسليم، وكل شي معمول ام صالح حسابه، والسالفة وما فيها كلها ضغطت زر ازرق او احمر"؟
المعاق: "حاضرين نجيب لكم العلم الحقيقي، ان السالفة كانت كده واحنا كنّا جذا، ورغم جذا عملنا كده، ودي معجزة السيستم الجديد! انا أمس بأول يوم دوام بالسنة الجديدة كنت بمراجعة عندهم، وللأسف اهل الفرح والمعازيم كلهم حاضرين كلن بمحله! وكل شيك ماشي على حسب بنات الأصول، الا السيستم طلع خارج النص مرة يشتغل، وإمرار واقف يبي اشتراك، وعند السؤال عن صحة المدعو سيستم؟ كان الجواب: ان اجهزته جديدة، وتوها داخله الخدمة من كم يوم!
هنيتهم على حسن التدبير والتخطيط، وحسن الاستعداد لعام جديد، ومن ثم أخذت عصاتي اللي ما تعصاني اجر ورأي اذيال الخيبة على وقت قضيته بانتظار السستم، اللي أبا الا ان يكسر بخواطرنا، ولسان حاله حاول مرة أخرى!
واليوم اقولك ياحجي بوس يدك وجه ولحية، ان استلمت الزيادة بشهر فبراير، وسلامتكم وسلامة سيستم عام 24 المتطور".
المتمولس: "اللي يتكلمون من وراء ظهري بليز سوولي مساج"!
وفي هذه الاثناء رفع على مسامعنا الشيخ زغلول اذان الظهر.

كاتب كويتي

‏[email protected]