بيض الله وجهك يا سيستم التأمينات

"اسمعوا أجد بربسة من بربسات القرارات (حلو بسمسم) المحلية، يقولون أزمة إصلاح الشوارع تعود للمربع الاول، بعد ان تم إلغاء 10 مناقصات دولية!
وهالكلام كتبة الزميل محمد غانم في جريدة "السياسة"، وان سبب الالغاء هو ارتفاع أسعار عطاءات الشركات العالمية"!
الشايب: "بارك الله فيك يابو الشباب، وبمناسبة هالخبر المتوقع، يسر تسجيلات عمكم الشايب ان تسرد لكم حدودة، واكاد اجزم بانكم سامعين فيها!
ومن باب الميانة عليكم راح اقولها واعيدها على مسامع حضراتكم: يقولون بوه ورع يسرح بغنم اهل القرية، وهالغليم يؤذي القاع اللي يمشى عليه، بسبب لقافته وشيطانته، اللي يعجزون عن شيلها حماميل ولا عربنات سوق المباركية، ولا حتى بعارين ساحة الصفاة المجاورة لها.
بيوم من ايام الملل حب يمقلب القرية واهلها، بعد ان صاح بعلو صوته الذيب…الذيب ارثع بالغنم الحقوا عليها!
جم اهل القرية يتراكضون اللي معاه درنفيس…حديده…قزازه، ولكنهم تفاجأوا بان الراعي يضحك عليهم، وللأسف تكررت السالفة لمرتين، وكل مرة يقولون له يا بزر هديت حيلنا، مع توبيخ وانذار بعدم تكرارها مرة اخرى!
وبعد ساعة من الزمن شاف الذيب يتسحب على الحلال على أطراف اصابعه! صاح وناح الذيب… الذيب، لكن تعذر اجراء المكالمة لان اهل القرية صاكينه ميوت، على بالهم يضحك عليهم مثل كل مرة!
ما طولها عليكم، قول طول، غابت شمسهم والراعي ما جاهم، لا هو ولا غنمه! أرسلوا مرسولهم يشوف وش بلاه ما رجع للقرية!
قال: ابكي على ما جرى لي ياهلي، الذيب اكل لي كم طلي، ولا حصل من يحل المشكلة!
صحت يا ناس روحي وغنمي تراها في خطر كله من اللي على غنمي خطر! اقترب منه حكيم القرية وقرصه بأذنه وقال: دامك جذبان يا وليدي ما راح أحد يصدقك لو نبحت لآخر الليل، وسلامتك"!
الخبير: "ايه يا حاج، هو انت عندك انحراف بمحور الفهم والا ايه، انت بتقول ايه؟ باين ان الزهايمر شغال على السريع يا عمي الفنكوش! على العموم احنا بنحب ندي فرص للناشئين، ومتخفش هنعتمد قصتك بمقالة النهاردة يا ضنيا".
الرجل: "يا خبير هدئ من روعك لا يطق لك عرق، عمي الشيخ بحره غويط، لا انا ولا انت نقدر نعوم فيه، لان صعب علينا نستوعب اللي يقصده، الا بعد كم مرة قراءة، يالله نفهم وش يقصد وسلامتك".
المتمولس: "سؤال يرفس داخل دماغي: الانسان لحم او دجاج"؟ وفي هذه الاثناء رفع على مسامعنا الشيخ زغلول اذان الظهر.
كاتب كويتي

‏[email protected]

محمد خلف