حُفر الشوارع أولاً يا الوزيرة

شفافيات

شكثر قلنا، وشكثر لبحنا، وحنينا، ورنينا، وتألمنا، واشتكينا يا حكومة، ومارديتوا علينا، ليش؟ ليش ما تلبون لبحتنا، وشكوانا، ليش ليش؟
"ليش احنا مو امانة في اعناقكم؟ ليش انتوا مو مسؤولين عنا وعن صحتنا وعن حلالنا؟
ترى ظهورنا وعظامنا تكسرت، وسياراتنا يا حرام ما تهنينا فيها، والله العظيم، انا شاري سيارة "وانيت فورد اف مية وخمسين، اربعة ابواب جديدة؛ وللمرة الاولى في حياتي اسوق "وانيت"؛ مشتريه وفرحان فيه، واستلمته ورايح البيت اوريه عيالي؛ مو حرام يا مهندسة نوره تنكسر جامته قبل لا اوصل البيت على الدائري الخامس؟
وترى المسافة بين معرض الغانم للسيارات وبيتنا ستة كيلومترات، مو حرام اروح فيه البيت وجامتها مطقوقة بحصمة صلبوخة كبر التيلة العودة؛ تعرفين شنهي التيلة؟
ما تهنيت فيها حتى ربع ساعة، مو حرام جذي؟ منو مسؤول عنا يا مهندسة نوره غيركم، يا اعضاء الحكومة كل في وزارته؟
أنا ابيج يا معالي الوزيرة تكلفين نفسج يا مهندسة، وتتمشين بسيارة الحكومة، مو سيارتج عشان ما تتكسر؛ وتبتدين التمشي من بعد دوار الامم المتحدة باتجاه السالمية على الطريق الدائري الرابع، وشوفي من فضلك الحفر والاخاديد في الشوارع، تحطم السيارة تحطيما، وربما تتسبب في حوادث مميتة، بسبب المعولص في الشوارع لتجنب الحفر.
الله يا مهندسة نوره، احنا لما نسافر لدول العالم الآخر، واقربها تركيا، ونشوف الشوارع لونها احمر؛ ما ادري ليش لونها احمر، والله العظيم يا المهندسة نوره نستانس بنعومة الشوارع، ونتحسر دايما على شوارع الكويت.
واذا قلنا حق راعي التاكسي التركي سبب وناستنا ما يصدق؛ يقول انتوا بلد البترول، معقولة شوارعنا احسن من شوارعكم؟
اللي نبيه منج يا اختنا الفاضلة قبل لا تسوين مناقصة او مزايدة، وتجار الشوارع يتهاوشون على المناقصة، ويحطون لحسة اسفلت، نبي منج، وعلى عجالة اليوم قبل باجر؛ تكفين… تكفين؛ تشترين شاحنة اسمنت خرساني جاهزة من القطامي، او من اي شركة وتسكرين الحفر.
ترى تسكيرها ما يكلف عليكم لا وقت ولا فلوس؛ وبعدين سوي مناقصة ومزايدة؛ واللي تبون تسوونه وتسمونه.
ونبارك لج المنصب، والله يعينج على ما ابتلاج فيه.
وكلكم راع وكلكم مسؤول عن رعيته؛ ويقول عمر بن الخطاب، رضي الله عنه؛ لو عثرت بغلة في العراق لظننت ان عمر مسؤول عنها يوم القيامة؛ لِمَ لَمْ يسو لها الطريق.
اي بغلة… اي بغلة!
سياراتنا تكسرت معاوناتها، وتقطعت تايراتها، يا ليتها كانت بغلة من غير تايرات ولا معاونات.

كاتب كويتي

[email protected]

د. حمود الحطاب