"خثاريق" مشاهير

محمد خلف الشمري

الشايب:" بيوم من الايام الغابرة كان فيه أربعة من السفهاء تقابلوا بسفرة!
قال واحد منهم: دام دربنا واحد خلونا نتخاوى على عز ومعزه نونس ونساعد، ونأكل مع بعض!
البقية أحبوا الفكرة وهم بالطريق حان وقت العشاء حطوا كل ما معهم من اكل، وللأسف تسابقوا على الاكل، كل واحد يحاول يأكل أكثر من خويه، لين نظفوا صحنهم وطلعوا وردته!
وفي اليوم الثاني أحس السفهاء بالجوع، فقال واحد منهم: ليش ما نصوم باقي الايام، وان جاء رمضان نفطرهم (فك الفك)؟
وافق البقية لان ما فيه حل غير هذا، وعند حلول وقت الغداء كانوا قد وصلوا الى احدى القرى فاستضافهم مختارها على الغداء، لكنهم اعتذروا (مغاريد) بحجة أنهم صيام، وواصلوا سفرهم وقبل غروب الشمس بشوي وصلوا الى بيت داخل بستان وطقوا بابه، ففتحت لهم سيدة القصر (فاتن حمامه) وسألتهم خير عاوزين ايه؟
فقالوا لها: عسى ما شر نشوف مدفع الإفطار تأخر عندكم هو الشهر الفضيل خلص؟ بادرتهم بنظرة كلها خوف، وهي تكلم نفسها الله يفكني من هالمجانين؟
ثم قالت: ويه شخباري رمضان باجي له خمسة أشهر ثم صكت الباب!
واول ما جاء بعلها قلت له سالفتهم، عندها هاج وماج بالعاج من تصرفها الارعن!
ثم طلع من البيت يدورهم، وبالفعل حصلهم جالسين برأس العاير، وعاد بهم الى بيته وأطعمهم، ثم ذهب لقضاء بعض الحاجات وتركهم ليصلون المغرب والعشا جمعا.
فقال واحد منهم: انا اقترح كل واحد منا يمشي في سبيل حاله لان جمعتنا (عمياء) جابت لنا الجوع!
ما أطولها عليكم، قل طول، وافقوا على هذا المقترح بأغلبية، وقاموا يصلون كلن بروحه، وبالصدفة رد معزبهم فوجدهم على هذي الحال فاستغرب!
عندها تكلم واحد منهم، وهو يصلي القبلة صح يا معزبنا؟
فأجابه الثاني: صلاتك باطلة لأنك تكلمت!
فقال الثالث: يا حمار (اعزكم الله) بعد انت بطلت صلاتك لأنك رديت عليه!
فتنحنح الرابع، وقال بفرح: الحمد لله ان صلاتي ما بطلت لأني ما تكلمت، وبهاللحظة أيقن معزبهم ان قازهم خالص، ولهذا سحب روحه انسحاب تكتيكي مثل ابو جابر من العرزالة، وتركهم لين يخلصون صلاتهم، ثم سألهم: أنتم لكم كم يوم على هالخوه يا ضيوف الرحمن؟
فقال أحدهم: لنا حوالي أسبوع!
ولا ليش تصومون؟
قالوا له: نقدم بعض ايام رمضان عشان إذا جاء نفطر كثرهم، تعرف رمضان جوه حار وغيلة!
أنصدم من أجوبتهم ثم سألهم وش محتاجين لدربكم (الله يقلع هالوجيه الفاهية)؟
قالوا: ما نبي منك غير تسحرنا قبل ما نمشي!
فقال لهم معزبهم ساخرا: بس بكرة اول ايام العيد ما يجوز تصومونه؟
وبالختام وزبدة الكلام قبل لا الخبير يدخل على الخط، هذا هو حال عيالنا خصوصا البعض من بناتنا هاليومين، بعد تقليدهم لمشاهير السوشيل ميديا وخثاريقهم (ممر السعادة المطار...سيارات...عطور...معارض ذهب وياقوت ومرجان، ودراريع، وكل يوم في بلد، وسوشي الله يرحم ايام البلاليط) اللي ما دفعوا لها فلس حمر من جيوبهم، وآه يا نافوخى يا أمه".
المتمولس:" سالفة أنى اداوم كل يوم عشان معاش يخلص اول الشهر شغله مو عاجبتني حسو فينا حسحسونا"!
وفي هذه الاثناء رفع على مسامعنا الشيخ زغلول اذان الظهر.

كاتب كويتي