سيد الجوخ

معجب الصقيري

ماجيت ابمسح جوخ ياسيد الجوخ
ولا جيت انمق في حضورك كلامي
انا بشر من كثر ما فيني شموخ
اجبرك لا من جيت غصب احترامي
تزعم بأنك شيخ ومن ترثة شيوخ
ما ثار ما تزعم فضول اهتمامي
إن كان ماجيتك على العز مطنوخ
ما جيت اضيع في ربوعك مقامي
فيني جمل لا ثار لا يمكن ينوخ
يحرم علي لو ناخ لذة منامي
وان كان بشتك شالته حفنة دلوخ
كرامتي بالصف الاول امامي
لو ترسم لنفسك جبل فوقه الكوخ
ماني مطيّر في ظلالك حمامي
ولو ما بقى فوق النخل غير شمروخ
اشيل حملي لو تكسر عظامي
ولو ماتت من الجوع في عشي فروخ
ما ذل نفسي لجل لقمة طعامي
وإن كان صرحك من ع السور مشروخ
ما يبني جدارك بقايا حطامي
وإن كان صدرك من هوا الكبر منفوخ
يضيق صدرك في خفايا ظلامي
لا ترفع عيونك على سهيل وتدوخ
لولا الطمع ما ضاع حلم الحرامي
يا للي زرعت الشوك لا ترجي الخوخ
لا بد ما تجنيه و تذكر كلامي