عبلة كامل تنفي الاعتزال والسرطان

تلقت الإعلامية المصرية لميس الحديدي، اتصالا هاتفيا من الممثلة الكبيرة عبلة كامل، فندت فيها الشائعات التي طاولتها أخيرة خصوصا الاعتزال وإصابتها بالسرطان.
وقالت الحديدي في برنامجها "كلمة أخيرة": "عندي قصة ورسالة، تلقيت اتصالا من أجمل الاتصالات.. ألو لميس أنا عبلة، أنا عبلة كامل، وعاوزة أحكيلكم عن مشاعري، تقريبا لم اصدق، عرفت صوتها في ثانية ودي أول مره تكلمني فيها، أنا لي أصدقاء كتير من الوسط الفني لكن دي أول مرة الأستاذة عبلة تكلمني فيها".
وأضافت: "كنت بتكلم عن عبلة وبعتلها رسالة من هنا قلتلها أنا بحبك وقلت إنه من القسوة جدا نشر خبر عن مرضها وإنها حتى لو كانت مريضة فهي اختارت الصمت ولازم نحترم صمتها، بعدين تم تكذيب الخبر لاحقا من أسرتها وزوجها السابق الفنان أحمد كمال وابنتها زينب، وواضح أن رسالتي وصلتها".
وتابعت: "عبلة كامل قالت أمور اقدر أحكيها وأمور مش هقدر أحكيها بناء عن طلبها، لكن اللي أقدر أقوله من اتصال مدته 45 دقيقة إنها قالتلي بالنص: أنا سليمة وصحتي كويسة ومش تعبانة خالص وفرحانة جدا بحب الناس وعمري ما كنت أتصور إني محبوبة كده من الجمهور.. وأنا بقول حرفيا اللي قالته عبلة لأَني بصراحة حريصة على كلامها بدقة، وهي صوتها فعلا كويس ومش مريضة".
وتابعت الحديدي أنها طلبت من عبلة الإطلالة على الجمهور وطمأنة الناس بنفسها: "قلت طيب يا عبلة اطلعي طمني الناس اطلعي اتكلمي، ليه قافلة على نفسك؟ فردت: أنا بحب أمثل بس، أنا معرفش أعمل عبلة، بعرف أمثل بس.. حاولت أفهم العبارة، وعرفت انها تقصد هي ممثلة على الشاشة لكن في الحقيقة هي إنسانة وأم عادية جدا، مش عاوزة تبذل مجهود تاني علشان تتكلم أو تتصور لأن الأضواء مجهود، وده تفسيري أنا مش كلامها".
وقالت لميس انها سألتها خلال الاتصال عن حقيقة اعتزالها، وردت عبلة كامل: "لا طبعا، أنا بحب التمثيل جدا، ولو جاني دور حلو أكيد هشتغله، وأنا شفت مسلسلات رمضان اللي فات ولقيت فيها حاجات كتير جميلة جدا ومتنوعة، لكن مفيهاش دور يناسبني أو يستفز رغبتي في التمثيل، وأنا مستنية دور حلو أقدّمه للجمهور، ومتشكرة لكل واحد نفسه يشوفني على الشاشة".