مواطنون عن وظيفة حفار قبور: "مالقيتو للكويتي إلا هذي!"

كتب ـ
عبدالناصر الأسلمي:

موجة تهكم وسخرية واجهت إعلان ديوان الخدمة المدنية بالتنسيق مع بلدية الكويت عن "تكويت" وظيفة "حفار قبور" لمن أراد براتب شهري 1500 دينار، حيث عجت مواقع التواصل الاجتماعي بالتغريدات الرافضة لتشغيل المواطنين في مثل هذه الوظائف".
وقال المغرد حمد العجمي " ورب الكعبة لي الحين حوالي 3 سنوات ماتوظفت واني اتناقش مع اهلي في هذا الموضوع ، يعني مالقيتو للكويتي الا هذي ؟"، وقالت المغردة "بنت ابوها": "ما شاء الله هذا اللي قدرتم عليه الوافد يتعين بالوزارة والكويتي حفار قبور ليش مو العكس"، وعلق المغرد هاشم كمالي: "الحين كوتوا النفط والوزارات الثانية بعدين خلوه يحفر قبور!" وغردت المغردة فاطمة "حسبي الله ونعم الوكيل عليهم اللي يبي يذل الكويتي .. الحين الكويتي يشتغل حفار قبور والوافد قاعد بالمكاتب يأمر وينهى لاحول ولا قوة الا بالله".
وقال المغرد "عايش حر": "حفرة للكويتيين بهالقرار عارفين محد يتقدم فتجد غيرهم "حاضر يافندم" شوف التخطيط شلون"، وغرد المحامي خالد مفرج الدلماني " وليش ما يتجهون لتكويت وظائف القانونيين والمحاسبين والمهندسين والمدرسين ... الخ مادري بعض المسؤولين شلون يتخذون هالقرارات ! ".
وعلق المغرد "مواطن" " ياعيني على الوظيفة هذا اللي كنت اقول عنه من زمان ... هذا اللي كان ناطر كل كويتي بعد شتبون الحمد لله والشكر"، بينما تهكم المغرد عبدالله الهشام " اذا راح يخطب شيقول حفار قبور مبتدئ ولا كبير الحفارين يعني اذرب "، وقال المغرد "panadol": " يا اخي الشغل مو عيبة او حرام لكن عندك آلاف بمؤهل جامعي وظفه ومشي الوافد وبعدها اذا زاد عندك موظفين بعيني احفر قبرك".