هنا أو هنا زحمة؟

صاح ابو الشباب علي راجو وقال: "يابو هناد، هات الطفاية ابي احرق هالباكيت زقارة تلو زقارة"! تهامس الحضور فيما بينهم، وقال المعاق: "ماني خابرك يابو الشباب تشرب تتن (اعلم ابوك)"؟
الشاب: "اعلى ما بحميرك اركبه، من اليوم ورايح راح أدخن، خلاص مليت ما هي حاله، كل ما أجي للديوانية الف سبع لفات، أدور موقف جني الثعلب اللي بذيله سبع لفات"!
الخبير: "مشكلتك دي كمان الشناوي، انا اعانى منها، وبالع موسى العافية ماركة جيلت جي تو، مش قادر أشكي لمين، وأحكي لمين، دنيا بتلعب بينا اكمنى مصري، وأبويا مصري"؟
الرجل: "للاسف هذي مشكلة كل مناطق الكويت، وعلى الخصوص الجهراء وضواحيها، الكل يعاني من هذي المشكلة، وهذا الوضع الغريب المريب اللي ما ندري من وين جابه لنا الهواء، ورماه علينا"؟
الشاب: "كله من هجرة العمالة الهامشية من مناطقها الى الجهراء الامنة، بعد ان ضيقوا عليهم الوسيعة! اللهم يا كافي كل سيارة وسيارة بينهم سيارة، وسيكل، لدرجة ان كل ساحات المناطق والمساجد، والمواقف العامة والأسواق، انترست من سياراتهم!
وبهذي المناسبة أهديكم أغنية زحمة يا دنيا زحمة، يوكن وتاهو المساير عن الديوانية مولد، والداخليه غايبه"!
المعاق: "للاسف ما ندري من نشكي له ضعنا يالربع، ما بين تراك فود، وبقالة، وسيكل طلبات، وسكاريب السيارات! وازيدكم من الشعر الأبيض شعره، فيه ظاهرة جديدة، وهي انتشار الطراريد الخربانة بالساحات، اللي صارت بيوتا للكلاب اعزكم الله!
ولهذا اقترح عليكم فضلا، وليس أمرا، الحضور الى الديوانية مشي، او بتوصيله، لان الوضع صار مسخرة على الاخر، في ظل غياب اهل الجولات التفتيشية عن المشهد من مبطي، ما ندري وش اسبابه"؟
المتمولس: "يقولون فيه واحد اختفت زوجته، وبلغ الشرطة فقالوا له: عليك ان تتوقع الاسوأ؟ فقال: غبره (كلمة استهجان نسائية) يمكن ترجع"؟
وفي هذه الاثناء رفع على مسامعنا الشيخ زغلول اذان الظهر.

كاتب كويتي

محمد خلف الشمري

‏[email protected]