يا وزير طق فره على صيدليات "الصحة"

"حين يطلب عقلك قهوة يا راجو لا تتأخر عليه فهو يخبرك انه قد حان موعد تغير المزاج! انا بحب قهوة مظبوط، سيم… سيم حبل مربوط، ما يفرق بيننا أي نفر خربوط" قالها الخبير.
ثم سأل: "امال فين بابا يا صديق"؟
راجو : "آيس كلام انت، ما في مألوم بابا راحت اسبتول"!
الشاب: "يالله أنك تشافيه، وتعافيه، أرحب يا حجي وراك طولت"؟
الشايب: "أبقاك الله…اما سبب التطويل، فهو من كبر الصرح الصحي (على الهبني) لمدينة الجهراء الصحية! تصدق، والا احلفلك ثلاث ارباع المراجعة مشي بالممرات، والأدوار داعوس (ممر) ياخذك وداعوس يردك، لين ينهد حيلك، وينشف ريقك، وتطلب جغمة ماء وما عندك احد! وعقب كل هالفرفره، دخلت على الدكتور اللي جني خاطب أمه ماله خلق يشتغل، وكلامه من طرف منخاره! طلعت منه للصيدلية بمشوار جديد (فش تكاسي) لين حصلتها، وللأسف، العلاج غير متوفر كالعادة!قالي الصيدلي: الله يعينك روح اشتريه من برا، ما كثرت الكلام واشتريته من الصيدلية اللي للأسف ما عندهم شي بأقل من عشرة دنانير، دفعت، وانا اتحسب على اللي أقر لنا بطاقة عافية! لأنها من جت ما شفنا الخير معاها لان كل الصيدليات رفعت اسعارها، عشان تغرف منها باردة مبردة، على حساب سي عافية، واللي ماعنده قدرة! بس والله يعجبونك بيوم وليلة رفعوا أسعارهم! يعني هو فيه حد راح يسأل عنا؟
وعدوا رفع الأسعار صابت اللي يبنون بيوت عمرهم، بعد صدور قرار دعم بعض المواد! ما اقول يا حسرتي، ويا كسر قلبي، من ناس عندهم الامر والنهي لهم عشر سنين ماسكين مسطره وقلم يدرسون، ويخططون، ويناقشون، ويقترحون عيل اشلون؟ رفع رواتب متقاعدين، وموظفو الدولة اللي مادين براطمهم من الزعل والقهر على احوالهم المادية؟ ومن منبرنا هذا أطالب وزير الصحة، يجيب معاه وزير التجارة، لأجل طق فره يشوفون الأسعار والخدمات، وحبيبي، ويابور يا مولع حط الفحم".
الرجل: "ما تشوف شر، وربك يعدلها، وقبل الختام ابي اعرف رأي المسؤولين، جانهم يقرون تصرف عميد بإحدى الكليات التطبيقية، توه ماسك منصبه على أزمة تسجيل المواد!
يقولون طلع من مكتبه معصب وزعلان على الطالبات المتواجدات بالإدارة، وهو يقول: "عنكن ما سجلتن، ولاتخرجتن اطلعن برا بغا برا"، وسلامتكم".
المتمولس: "هالسنه اخر فرصه لحظي ان ما تعدل راح تشوفوني بقناة وناسه أرقص"!
وفي هذه الاثناء رفع على مسامعنا الشيخ زغلول اذان الظهر.
كاتب كويتي

محمد خلف الشمري

‏[email protected]